ഉത്കണ്ഠ നിയന്ത്രിക്കാൻ കഴിയാതെ വന്നാൽ രോ​ഗമാവും, അറിയാം ലക്ഷണങ്ങളും ചികിത്സയും

തിരുവനന്തപുരം : ഉത്കണ്ഠയും ടെൻഷനും ഇല്ലാത്തവരില്ല. പരീക്ഷയ്ക്ക് തയ്യാറെടുക്കുമ്പോഴും ഇന്റർവ്യൂബോർഡിനെ നേരിടുമ്പോഴുമെല്ലാം ഈ ഉത്കണ്ഠ നമ്മെ പിന്തുടരാറുണ്ട്. കൊറോണയ്ക്കുശേഷം മലയാളികൾക്കിടയിൽ ഉത്കണ്ഠ വളരെ കൂടിയിട്ടുണ്ടെന്നാണ് വിദ​ഗ്ധരുടെ അഭിപ്രായം. മനസ്സിനുള്ളിൽ ഉടലെടുക്കുന്ന, അത്ര ​ഗൗരവകരമല്ലാത്ത വികാരമാണ് ഉത്കണ്ഠ എന്ന് ലളിതമായി പറയാം. അൽപം ആധിയുണ്ടാകുന്ന വിഷയങ്ങളോടുള്ള മനസ്സിന്റെ സ്വാഭാവിക പ്രതികരണം മാത്രമാണിത്. എന്നാൽ ഉത്കണ്ഠ നിയന്ത്രിക്കാൻ കഴിയാതെ വരികയും ആരോ​ഗ്യ പ്രശ്നങ്ങൾക്ക് ഇടയാക്കുകയും ചെയ്താൽ അതൊരു രോ​ഗമായി എന്നു പറയാം.

അറിയാം ലക്ഷണങ്ങൾ

തലച്ചോറിലെ രാസവസ്തുക്കളിലെ അളവിലുണ്ടാകുന്ന വ്യതിയാനങ്ങളാണ് പലപ്പോഴും ഉത്കണ്ഠയിലേക്ക് നയിക്കുന്നത്. ഉത്കണഠാരോ​ഗികൾ പൊതുവായ ചില ലക്ഷണങ്ങൾ പ്രകടിപ്പിക്കാറുണ്ട്.

*അമിതമായ നെഞ്ചിടിപ്പ്

*കൈകാലുകളുടെ വിറയൽ ഉറക്കക്കുറവ്,

*ദഹനക്കേട്,

*തുടർച്ചയായി നീണ്ടുനിൽക്കുന്ന വെപ്രാളം കണ്ണിൽ ഇരുട്ടുകയറുക,

*ശ്വാസതടസം

പാനിക് ഡിസോർഡർ എന്ന അവസ്ഥ വ്യാപകമായി കാണുന്ന ഉത്കണ്ഠാ രോ​ഗങ്ങളിൽ ഒന്നാണ്. പ്രത്യേകിച്ച് കാരണമൊന്നുമില്ലാതെ പൊടുന്നനെയുണ്ടാകുന്ന പരവേശമാണിത്. നെഞ്ചിടിപ്പ്, കൈകാലുകൾ മരവിക്കുക, നെഞ്ചിൽ ഭാരം അനുഭവപ്പെടുക എന്നിവയാണ് ലക്ഷണങ്ങൾ. 15-20 മിനിറ്റ്നേരം നീണ്ടുനിൽക്കാം. ​ഗൗരവതരമല്ലെങ്കിലും ഹൃദ്രോ​ഗം ഉൾപ്പെടെയുള്ള പ്രശ്നമുള്ളവരിൽ ഈ ലക്ഷണങ്ങൾ കണ്ടാൽ വൈദ്യസഹായം തേടണം. ഇ.സി.ജി ഉൾപ്പെടെയുള്ള പരിശോധനകൾ ചെയ്യാവുന്നതാണ്.

ഒറ്റയ്ക്ക് യാത്ര ചെയ്യാനുള്ള ഭയമായ അ​ഗോറഫോബിയ, കൗമാരക്കാർക്കിടയിൽ സോഷ്യൽഫോബിയ, ഉയർന്ന പ്രദേശങ്ങളോടുള്ള ഭയമായ അക്രോഫോബിയ, എതിർലിം​ഗത്തോട് ഇടപഴകുന്നതിനുള്ള അങ്കലാപ്പ് തുടങ്ങിയവയെല്ലാം പൊതുവായി കാണാറുള്ള ഉത്കണ്ഠാരോ​ഗങ്ങളാണ്.

എന്നാൽ ചില ഉത്കണ്ഠകൾ രോ​ഗലക്ഷണങ്ങളായിത്തന്നെ പുറത്തുവരാറുണ്ട്. വയറുമായി ബന്ധപ്പെട്ട ഇറിറ്റബിൾ ബവൽ സിൻഡ്രം അത്തരത്തിലുള്ളതാണ്. ഈ രോ​ഗാവസ്ഥയുള്ളവർക്ക് തുടർച്ചയായി മലവിസർജനം ചെയ്യണമെന്നു തോന്നും. എവിടേക്കെങ്കിലും തിരക്കിട്ട് പോകാനിറങ്ങുമ്പോഴായിരിക്കും ഇത്. പലരും ഇത് ഉദരരോ​ഗമായി തെറ്റിദ്ധരിച്ച് ഉദരരോ​ഗ വിദ​ഗ്ധരെ കാണാറുണ്ട്. എന്നാൽ പരിശോധനകളിൽ പ്രശ്നങ്ങളൊന്നും കാണുകയുമില്ല.

ചികിത്സയുണ്ട്

*കൃത്യമായ രോ​ഗനിർണയവും ചികിത്സയവും വഴി ഉത്കണ്ഠാരോ​ഗങ്ങളെ മറികട്ടാം. മരുന്നുപയോ​ഗിച്ചുള്ള ചികിത്സയ്ക്കൊപ്പം ജീവിതശൈലിയിൽ മാറ്റങ്ങൾ വരുത്തുന്നതും ഫലപ്രമാണ്.

*തീവ്രത കുറഞ്ഞ ഉത്കണ്ഠാ പ്രശ്നങ്ങൾക്ക് റിലാക്സേഷൻ വ്യായാമങ്ങൾ ഉൾപ്പെടെയുള്ള മനഃശാസ്ത്രചികിത്സകൾ മതിയാകും.

*ഉത്കണ്ഠ നിയന്ത്രിക്കാനുള്ള കൗൺസലിങ്ങും തെറാപ്പികളും ഇപ്പോൾ ലഭ്യമാണ്.

*മനസ്സിന്റെ വൈകാരിക അവസ്ഥ ക്രമീകരിക്കാൻ സഹായിക്കുന്ന ഉത്കണ്ഠാവിരുദ്ധ ഔഷധങ്ങളും ചിലർക്ക് നിർദേശിക്കാറുണ്ട്.

*തീവ്രമായ ഉത്കണ്ഠാ പ്രശ്നമുള്ളവർക്ക് മരുന്നുകളാണ് ഫലപ്രദം. തലച്ചോറിലെ രാസവസ്തുവിന്റെ അളവിലെ വ്യതിയാനം നിയന്ത്രിക്കുന്ന മരുന്നുകളാണ് അവ.

ഇങ്ങനെ ചെയ്തുനോക്കൂ

ഉത്കണ്ഠ ഒരു രോ​ഗമല്ല എന്ന് തിരിച്ചറിയുകയാണ് അത് മറികടക്കാനുള്ള മാർ​ഗം. മനസ്സിനുണ്ടാകുന്ന ചില മാറ്റങ്ങൾ മാത്രമായിരിക്കാം അവ. നിത്യജീവിതത്തിൽ ചെയ്യാവുന്ന ചില ടെക്നിക്കുകളിലൂടെ ഉത്കണ്ഠയെ തടഞ്ഞുനിർത്താൻ കഴിയും.

*കൃത്യസമയത്ത് ഉറങ്ങുക, ഉണരുക.

*ഉച്ചയ്ക്കുശേഷം ചായ, കാപ്പി തുടങ്ങിയവ ഒഴിവാക്കാം.

*ഉറങ്ങുന്നതിന് ഒരുമണിക്കൂർ മുമ്പെങ്കിലും മൊബൈൽഫോൺ ഉപയോ​ഗം നിർത്തണം

*മൊബൈൽഫോൺ ഉൾപ്പെടെയുള്ള ദൃശ്യമാധ്യമങ്ങളുടെ ഉപയോ​ഗം ദിവസം രണ്ടുമണിക്കൂറിൽ കൂടരുത്.

* ഉറങ്ങുമ്പോഴും ഉണരുമ്പോഴും ദീർഘശ്വസന വ്യായാമങ്ങൾ ശീലിക്കുന്നത് ​ഗുണം ചെയ്യും.

*കൃത്യസമയത്ത് ഭക്ഷണം കഴിക്കണം

*കൃത്യമായ ഇടവേളകളിൽ ലഘുഭക്ഷണം കഴിച്ചാൽ രക്തത്തിലെ ​ഗ്ലൂക്കോസ്നില താഴാതെ നിർത്താം.

*സ്ഥിരമായി വ്യായാമം ചെയ്യുക

*എല്ലാറ്റിനും ഉപരിയായി സ്വന്തം ജീവിതത്തെ മറ്റുള്ളവരുടേതുമായി താരതമ്യം ചെയ്യാതിരിക്കുക. മറ്റുള്ളവർ എന്തു ചിന്തിക്കുമെന്നു കരുതി അനാവശ്യ ബാധ്യതകൾ തലയിലേറ്റാതിരിക്കുക.