വായില്‍ കൈപ്പാണോ..?

വായില്‍ കൈപ്പ് അനുഭവപ്പെടുന്നത് പല കാരണങ്ങള്‍ കൊണ്ടായിരിക്കാം. പ്രമേഹം, പനി, അല്ലെങ്കില്‍ കരള്‍ രോഗങ്ങള്‍ എന്നിവ ഉള്‍പ്പെടുന്നു. പുതിന ചായ കുടിക്കുക, പെരുംജീരകം ചവയ്ക്കുക, മല്ലി വെള്ളം കുടിക്കുക തുടങ്ങിയ വീട്ടുവൈദ്യങ്ങള്‍ ഇതിന് പരിഹാരമായേക്കാം, എന്നാല്‍ ഈ പ്രശ്‌നം തുടരുകയാണെങ്കില്‍ ഒരു ഡോക്ടറെ സമീപിക്കേണ്ടത് അത്യാവശ്യമാണ്. 

വായയില്‍ ബാക്ടീരിയ അടിഞ്ഞുകൂടുന്നത് കാരണവും പല്ലിനടിയില്‍ ഭക്ഷണം ജീര്‍ണ്ണിക്കുന്നത് കാരണവും വായില്‍ കയ്പ്പ് അനുഭവപ്പെടാം. പ്രമേഹ രോഗികളില്‍ വായില്‍ കയ്പ്പ് സാധാരണയായി കാണാറുണ്ട്. 

രക്തത്തിലെ പഞ്ചസാരയുടെ അളവ് നിയന്ത്രിക്കുന്നത് ഇതിന് സഹായിച്ചേക്കാം. പനി പോലുള്ള അസുഖങ്ങള്‍ ശരീരത്തില്‍ വീക്കം ഉണ്ടാക്കുന്നത് വായില്‍ കയ്പ്പ് ഉണ്ടാക്കാന്‍ കാരണമാകാം. കരള്‍ രോഗങ്ങള്‍ വിശപ്പ് കുറയുന്നതിനും വായില്‍ രുചി വ്യത്യാസങ്ങള്‍ ഉണ്ടാകുന്നതിനും കാരണമാകും.
 
പരിഹാരങ്ങള്‍

എല്ലാ ദിവസവും ഭക്ഷണം കഴിച്ചതിന് ശേഷം പല്ല് തേയ്ക്കുന്നത് വായിലെ അണുക്കളെ അകറ്റി കയ്പ്പ് കുറയ്ക്കാന്‍ സഹായിക്കും. 

ഭക്ഷണത്തിന് ശേഷം ഒരു ടീസ്പൂണ്‍ പെരുംജീരകം ചവയ്ക്കുന്നത് ദഹനത്തെ സഹായിക്കുകയും കയ്പ്പ് കുറയ്ക്കുകയും ചെയ്യും. മല്ലി വെള്ളത്തില്‍ രാത്രി മുഴുവന്‍ കുതിര്‍ത്ത് വെച്ച്, അരിച്ചെടുത്ത് ദിവസം മുഴുവന്‍ കുടിക്കുന്നത് നല്ലതാണ്. 

പുതിനയില ചൂടുവെള്ളത്തില്‍ ഇട്ട് തിളപ്പിച്ച് കുടിക്കുന്നത് വായില്‍ തണുപ്പ് നല്‍കാനും പിത്തം കുറയ്ക്കാനും സഹായിക്കും. തണുത്ത വെള്ളത്തില്‍ നാരങ്ങാനീരും തേനും ചേര്‍ത്തുകുടിക്കുന്നത് രുചി സാധാരണ നിലയിലാക്കാന്‍ സഹായിക്കും.