കാലിലെ നീര് പ്രധാന കാരണങ്ങള്‍

കാലില്‍ നീര് വരാന്‍ പ്രധാന കാരണം ശരീരത്തില്‍ ദ്രാവകം കെട്ടിക്കിടക്കുന്നതാണ്. ശരീരത്തിലെ കോശങ്ങളില്‍ ദ്രാവകം അമിതമായി അടിഞ്ഞുകൂടുന്ന അവസ്ഥയാണ് എഡിമ. ഇത് കാലുകള്‍, കണങ്കാലുകള്‍, കൈകള്‍ തുടങ്ങിയ ശരീരഭാഗങ്ങളില്‍ കാണാറുണ്ട്.
 
ഹൃദയസ്തംഭനം, വൃക്കരോഗങ്ങള്‍, കരള്‍ രോഗങ്ങള്‍ എന്നിവ ശരീരത്തിലെ ദ്രാവകത്തിന്റെ അളവിനെ ബാധിക്കുകയും കാലുകളില്‍ നീരുണ്ടാക്കുകയും ചെയ്യും. പ്രമേഹരോഗികളില്‍ രക്തത്തിലെ പഞ്ചസാരയുടെ അളവ് കൂടുന്നത് മൂലം ഉണ്ടാകുന്ന ദ്രാവകം കെട്ടിക്കിടക്കുന്നത് കാലുകളില്‍ നീരുണ്ടാക്കാം. 

വെരിക്കോസ് സിരകള്‍, രക്തം കട്ടപിടിക്കുന്നത് തുടങ്ങിയ സിരകളിലെ പ്രശ്‌നങ്ങളും കാലിലെ നീരിന് കാരണമാകാറുണ്ട്. കാലിന് നേരിട്ടുള്ള പരിക്ക്, അണുബാധകള്‍ എന്നിവ കാരണം വീക്കം ഉണ്ടാകാം. 
ചില മരുന്നുകളുടെ പാര്‍ശ്വഫലമായും കാലുകളില്‍ നീരു വരാം.