പനി, ക്ഷീണം; തലയിലെ നീര്‍ക്കെട്ട് ലക്ഷണങ്ങള്‍

തലയിലെ നീര്‍ക്കെട്ട് (സൈനസൈറ്റിസ്) പല ലക്ഷണങ്ങള്‍ ഉണ്ടാക്കാറുണ്ട്.   സൈനസ് അറകള്‍ സ്ഥിതി ചെയ്യുന്ന ഭാഗങ്ങളില്‍ കഠിനമായ വേദന ഉണ്ടാകാം. നെറ്റി, കണ്ണിന് ചുറ്റും, കവിള്‍ത്തടങ്ങള്‍ എന്നിവിടങ്ങളിലാണ് ഇത് സാധാരണയായി അനുഭവപ്പെടുന്നത്.

 മൂക്കിന്റെ അറകളിലെ വീക്കം കാരണം ശ്വസിക്കാന്‍ ബുദ്ധിമുട്ട് അനുഭവപ്പെടാം.  മൂക്കിലൂടെയോ തൊണ്ടയുടെ പിന്നിലൂടെയോ കട്ടിയുള്ള കഫം പുറത്തുപോകാം. ഇത് മഞ്ഞയോ പച്ചയോ നിറത്തിലായിരിക്കാം.  സൈനസ് അറകളില്‍ കഫം കെട്ടിക്കിടക്കുന്നതിനാല്‍ മുഖത്ത് ഒരുതരം ഭാരം അനുഭവപ്പെടാം.  

ചിലരിലെ നീര്‍ക്കെട്ടിനോടൊപ്പം പനിയുമുണ്ടാകാം. ശരീരത്തിന് ആയാസം തോന്നുന്നതും ക്ഷീണവും ഉണ്ടാകാം.  കവിള്‍ത്തടങ്ങളിലെ നീര്‍ക്കെട്ട് പല്ലുവേദനയായി അനുഭവപ്പെടാം.  തൊണ്ടയില്‍ കഫം അടിയുന്നത് മൂലം ചുമയും ഉണ്ടാവാം.