ചിക്കുന്ഗുനിയയ്ക്ക് പ്രത്യേക മരുന്നോ ചികിത്സയ്ക്ക് ശേഷം സങ്കീര്ണതകള് ഒഴിവാക്കാനാശ്യമായ ചികിത്സയോ ഇതുവരെ വികസിപ്പിച്ചിട്ടില്ല. കഴിഞ്ഞ വര്ഷം നവംബറില് യുഎസ് ഫുഡ് ആന്ഡ് ഡ്രഗ് അഡ്മിനിസ്ട്രേഷന് ചിക്കുന്ഗുനിയ വാക്സിന് അനുമതി നല്കിയിരുന്നു.
ചിക്കുന്ഗുനിയ അണുബാധയുടെ കാലഘട്ടം അവസാനിച്ചശേഷവും രോഗികള്ക്ക് സങ്കീര്ണമായ ആരോഗ്യപ്രശ്നങ്ങള്ക്കുള്ള സാധ്യതയുണ്ടെന്ന് പഠനം പറയുന്നു. രോഗലക്ഷണങ്ങള് കണ്ടു തുടങ്ങിയ ശേഷം 14 ദിവസമോ അതിലധികമോ ഈ അപകടസാധ്യത നീണ്ടുനില്ക്കാം. അണുബാധ പിടിപെട്ടവര് മറ്റുള്ളവരെ അപേക്ഷിച്ച് ആദ്യആഴ്ചയില് മരിക്കാനുള്ള സാധ്യത എട്ട് മടങ്ങ് അധികമാണ്.
അണുബാധയ്ക്കു ശേഷമുള്ള മൂന്നു മാസങ്ങളില് സങ്കീര്ണതകള് കാരണം മരിക്കാനുള്ള സാധ്യത ഇരട്ടിയാണ്. ഇസീമിക് ഹാര്ട്ട് ഡിസീസ്, മെറ്റബോളിക് പ്രശ്നങ്ങള്, വൃക്കരോഗങ്ങള് എന്നിവയാണ് കൂടുതലും മരണത്തിലേക്കു നയിക്കുന്നത്. പ്രായമോ ലിംഗവ്യത്യാസമോ ഇല്ലാതെ ആരില് വേണമെങ്കിലും ഈ അപകട സാധ്യത നിലനില്ക്കുന്നതായും പഠനം പറയുന്നു.