ഗാസ പൊലീസ് മേധാവിയെ കൊലപ്പെടുത്തി ഇസ്രയേല്‍

ഗാസ: ഗാസ പൊലീസ് ഡയറക്ടര്‍ ജനറല്‍ മഹ്‌മൂദ് സലാഹിനെ കൊലപ്പെടുത്തിയതായി ഇസ്രയേല്‍. 

തെക്കന്‍ ഗാസയിലെ അല്‍ - മവാസി അഭയാര്‍ഥി ക്യാമ്പുകള്‍ക്ക് നേരെ യുദ്ധവിമാനങ്ങള്‍ ഉപയോഗിച്ച് നടത്തിയ ആക്രമണത്തിലാണ് ഇദ്ദേഹം കൊല്ലപ്പെട്ടത്. 

ഇന്നലെ രാത്രി നടന്ന ആക്രമണത്തില്‍ പൊലീസ് മേധാവി അടക്കം 11 പേരാണ് കൊല്ലപ്പെട്ടത്. ഇദ്ദേഹത്തിന്റെ സഹായി ഹുസാം മുസ്തഫ ഷവാനും ആക്രമണത്തില്‍ കൊല്ലപ്പെട്ടതായാണ് വിവരം.

അതേസമയം, ജബാലിയ അഭയാര്‍ഥി ക്യാമ്പുകളില്‍ ബുധനാഴ്ച നടത്തിയ ആക്രമണങ്ങളില്‍ മരണം 17 ആയി. കൊല്ലപ്പെട്ടവരില്‍ ഭൂരിഭാഗവും സ്ത്രീകളും കുട്ടികളുമാണ്. 

കടുത്ത ഉപരോധം

ഒക്ടോബര്‍ ആറ് മുതല്‍ കടുത്ത ഉപരോധം തുടരുന്ന വടക്കന്‍ ഗാസയിലെ ജബലിയ, ബെയ്ത് ലാഹിയ എന്നിവിടങ്ങളില്‍ വീടുകള്‍ നശിപ്പിക്കുന്നതും തുടരുകയാണ്. 

വടക്കന്‍ ഗാസയില്‍ എല്ലാവരെയും ഒഴിപ്പിച്ച് കരുതല്‍ മേഖലയാക്കി മാറ്റുകയെന്ന ലക്ഷ്യത്തോടെയാണ് നടപടി.

ഗാസ സിറ്റി, ദക്ഷിണ ഖാന്‍ യൂനിസ്, ദേര്‍ അല്‍-ബലാഹ് എന്നിവിടങ്ങളില്‍ കനത്തമഴയെ തുടര്‍ന്ന് ജലനിരപ്പ് ഉയര്‍ന്നു. ഗാസയില്‍ അതിശൈത്യത്തിനൊപ്പം ശക്തമായ മഴയും എത്തിയത് ക്യാമ്പുകളിലെ ജീവിതം കൂടുതല്‍ ദുരിതത്തിലാക്കി. 

ഗാസ വെടിനിര്‍ത്തല്‍ 

ഗാസയിലേക്ക് പ്രതിദിനം 500ലേറെ ട്രക്കുകള്‍ ആവശ്യമായിടത്ത് ഒരു മാസത്തിനിടെ 160 ഭക്ഷ്യ ട്രക്കുകളാണ് അതിര്‍ത്തി കടക്കാന്‍ അനുവദിച്ചത്. അതിനിടെ, ഗാസ വെടിനിര്‍ത്തല്‍ ചര്‍ച്ചകള്‍ വീണ്ടും വഴിമുട്ടി. 

ബന്ദികളെ ജീവനോടെ ലഭിക്കണമെന്നും ഹമാസ് ആവശ്യപ്പെട്ട തടവുകാരെ വിട്ടയക്കാനാകില്ലെന്നും ഇസ്രയേല്‍ നിലപാടെടുത്തതോടെയാണ് ചര്‍ച്ച വഴിമുട്ടിയതെന്നാണ് റിപ്പോര്‍ട്ട്. 

30 ബന്ദികളെ വിട്ടയക്കുന്നതിന് പകരം 60 ദിവസ വെടിനിര്‍ത്തലാണ് ഇസ്രയേല്‍ മുന്നോട്ടുവെച്ചത്.