കുട്ടികളുടെ ക്ഷേമത്തിനായി 100 യൂറോ അധികധനസഹായം; 6.5 ലക്ഷം കുടുംബങ്ങൾക്ക് കൈത്താങ്ങായി അയർലണ്ട് സർക്കാർ

ഡബ്ലിൻ: കുട്ടികളുടെ ക്ഷേമത്തിനായി അയർലണ്ട് സർക്കാർ പ്രഖ്യാപിച്ച 100 യൂറോ അധികധനസഹായം ജനങ്ങളിലെത്തി തുടങ്ങി. ജീവിതച്ചെലവ് വര്‍ദ്ധിച്ചിരിക്കുന്ന സാഹചര്യത്തിലാണ് സർക്കാർ അധികസഹായം നൽകാൻ തീരുമാനിച്ചത്. രാജ്യത്തെ 650,000 കുടുംബങ്ങള്‍ക്ക് ചൈൽഡ് ബെനഫിറ്റ് പേയ്മെന്റ് ഇനത്തില്‍ 100 യൂറോ അധികധനസഹായം ലഭ്യമാക്കുന്നത് സാമൂഹികസുരക്ഷാ വകുപ്പാണ്.

അധികധനസഹായം പ്രഖ്യാപിച്ചതോടെ ഈ മാസം 240 യൂറോ വീതം രാജ്യത്തെ 12 ലക്ഷത്തിലേറെ കുട്ടികളുടെ ക്ഷേമത്തിനായി ലഭിക്കും. ഫെബ്രുവരി മാസത്തിലാണ് തുക വര്‍ദ്ധിപ്പിക്കുമെന്ന് സമൂഹികസുരക്ഷാ വകുപ്പ് മന്ത്രി പറഞ്ഞത്. 2023 ബജറ്റില്‍ ക്ഷേമപദ്ധതികള്‍ക്കായി മാറ്റിവച്ച 2.2 ബില്യണ്‍ യൂറോയ്ക്ക് പുറമെയാണ് ഈ സഹായം.

ജീവിതച്ചെലവിന് ആശ്വാസമേകാനായി പെന്‍ഷന്‍കാര്‍, കെയറര്‍മാര്‍, ഭിന്നശേഷിക്കാര്‍, ജോലി ചെയ്യുന്ന കുടുംബങ്ങള്‍ എന്നിവര്‍ക്ക് ഏപ്രില്‍ മാസത്തില്‍ 200 യൂറോ ജീവിത ചെലവിനായി സര്‍ക്കാര്‍ നല്‍കിയിരുന്നു.