കുവൈറ്റില്‍ അറുപതിന് മുകളിലുള്ള പ്രവാസികളുടെ 'റെസിഡന്‍സ്' പുതുക്കല്‍; 1,000 കെ.ഡി ചെലവാകുമോ? റിപ്പോര്‍ട്ടുകള്‍ ഇങ്ങനെ

കുവൈത്ത് സിറ്റി: സെക്കന്ററി വിദ്യാഭ്യാസമോ അതില്‍ കുറവോ യോഗ്യതയുള്ള അറുപതിന് മുകളിലുള്ള പ്രവാസികൾക്ക് വർക്ക് പെർമിറ്റ് പുതുക്കുന്നതിന് 500 കെ.ഡി ഫീസ് ചുമത്താനുള്ള പബ്ലിക് അതോറിറ്റി ഓഫ് മാൻപവറിന്റെ ഡയറക്ടർ ബോർഡിന്റെ തീരുമാനത്തിന്റെ നിയമസാധുത ഫത്വ നിയമനിർമ്മാണ സമിതി സ്ഥിരീകരിച്ചതായി പ്രാദേശികപത്രം റിപ്പോര്‍ട്ട് ചെയ്തു.

എന്നാല്‍ അന്തിമ തീരുമാനം സ്വീകരിച്ചിട്ടില്ലെന്നും, ഈ ഫീസ് അധിക കെഡി 500 ആയി ഉയർത്തുന്നത് അതോറിറ്റി പരിഗണിക്കുന്നുണ്ടെന്നും റിപ്പോര്‍ട്ടില്‍ പറയുന്നു. സ്വകാര്യ ഇൻഷുറൻസ് പോളിസി ഫീസ് പ്രതിവർഷം കെ.ഡി 500 നും കെ.ഡി 550 നും ഇടയിലായിരിക്കുമെന്ന്‌ ഇൻഷുറൻസ് കമ്പനികളും വാണിജ്യ, വ്യവസായ മന്ത്രാലയ ഉദ്യോഗസ്ഥരും തമ്മിലുള്ള ചർച്ചയിൽ പറഞ്ഞു.

അറുപതിന് മുകളിലുള്ള പ്രവാസികൾക്ക് ഇൻഷുറൻസ് ഉൾപ്പെടെ വർക്ക് പെർമിറ്റ് നൽകുന്നതിന് 1,000 കെഡി ചെലവ് വരുമെന്ന് പ്രതീക്ഷിക്കുന്നതായി റിപ്പോര്‍ട്ട് ചൂണ്ടിക്കാണിക്കുന്നു. ഇതുമായി ബന്ധപ്പെട്ടുള്ള നിയമത്തിന്റെ അന്തിമ മിനുക്കുപണികള്‍ നടക്കുകയാണ്.

വർക്ക് പെർമിറ്റ് പുതുക്കൽ ഫീസ് അടയ്ക്കുന്നതിൽ നിന്ന് ചില കമ്മ്യൂണിറ്റികളെയും ഗ്രൂപ്പുകളെയും ഒഴിവാക്കുന്നതിനെക്കുറിച്ചുള്ള അഭിപ്രായവും ഫത്വ ബോർഡിന്റെ തീരുമാനത്തിൽ ഉൾപ്പെടുത്തുമെന്ന് പ്രതീക്ഷിക്കുന്നതായി ബന്ധപ്പെട്ട വൃത്തങ്ങളെ ഉദ്ധരിച്ച്‌ അല്‍ റായ് പത്രം റിപ്പോര്‍ട്ട് ചെയ്തു.