മയക്കുമരുന്ന് കുറ്റകൃത്യങ്ങള്‍ക്ക് ദീര്‍ഘകാല ജയില്‍ ശിക്ഷ അനുഭവിച്ച 2,500 തടവുകാരുടെ ശിക്ഷ ഇളവ് ചെയ്യുമെന്ന് പ്രസിഡന്റ് ബൈഡന്‍

വാഷിംഗ്ടണ്‍: മയക്കുമരുന്ന് കുറ്റകൃത്യങ്ങള്‍ക്ക് ദീര്‍ഘകാല ജയില്‍ ശിക്ഷ അനുഭവിക്കുന്ന ഏകദേശം 2,500 തടവുകാരുടെ ശിക്ഷ ഇളവ് ചെയ്യുമെന്ന് പ്രസിഡന്റ് ബൈഡന്‍ പ്രഖ്യാപിച്ചു.

 ഒരു യു എസ് പ്രസിഡന്റ് ഇതുവരെ പുറപ്പെടുവിച്ചിട്ടുള്ളതില്‍ വച്ച് ഏറ്റവും വലിയ വ്യക്തിഗത ശിക്ഷ ഇളവ് ആണിത്. മയക്കുമരുന്ന് കുറ്റകൃത്യങ്ങള്‍ക്ക് നിലവിലുള്ള രീതികളേക്കാള്‍ കഠിനമായ ശിക്ഷ ലഭിച്ച കുറ്റവാളികള്‍ക്കാണ് ഈ ഇളവ് ലഭിക്കുന്നത്.

 ദീര്‍ഘകാല ക്രിമിനല്‍ നീതി അസമത്വങ്ങള്‍ ഇല്ലാതാക്കാന്‍ ലക്ഷ്യമിട്ടുള്ള നീക്കമാണിതെന്ന് ബൈഡന്‍ പറഞ്ഞു. ക്രിമിനല്‍ നീതി അസമത്വങ്ങള്‍ കറുത്തവര്‍ഗ്ഗക്കാരെ ബാധിക്കുകയും കൂട്ട തടവിലാക്കലിന് കാരണമാവുകയും ചെയ്തുവെന്ന് പല വിദഗ്ധരും ചൂണ്ടിക്കാട്ടുന്നു.

ചരിത്രപരമായ തെറ്റുകള്‍ തിരുത്തുന്നതിനും ശിക്ഷാ അസമത്വങ്ങള്‍ തിരുത്തുന്നതിനും അര്‍ഹരായ വ്യക്തികള്‍ക്ക് അവരുടെ കുടുംബങ്ങളിലേക്കും സമൂഹങ്ങളിലേക്കും മടങ്ങാനുള്ള അവസരം നല്‍കുന്നതിനുമുള്ള സുപ്രധാന ചുവടുവയ്പ്പാണ് നടപടിയെന്ന് ബൈഡന്‍ പ്രസ്താവനയില്‍ പറഞ്ഞു.