ഇന്ത്യയ്ക്കുമേല്‍ തീരുവ ചുമത്താനുള്ള നീക്കത്തില്‍ എതിര്‍പ്പുമായി യുഎസ് കോണ്‍ഗ്രസ് അംഗം സുഹാസ് സുബ്രഹ്‌മണ്യം

വാഷിംഗ്ടണ്‍: ഇന്ത്യയ്ക്കുമേല്‍ തീരുവ ചുമത്താനുള്ള നിയുക്ത ട്രംപ് ഗവണ്മെന്റിന്റെ നീക്കത്തിനെതിരെ പ്രതികരിച്ച് യുഎസ് കോണ്‍ഗ്രസ് അംഗമായി തെരഞ്ഞെടുക്കപ്പെട്ട സുഹാസ് സുബ്രഹ്‌മണ്യം. 

പുതിയ ട്രംപ് ഭരണകൂടം ഇന്ത്യന്‍ കയറ്റുമതിക്ക് കൂടുതല്‍ താരിഫ് ഏര്‍പ്പെടുത്താനുള്ള സാധ്യതയ്ക്കിടയിലാണ് സുബ്രഹ്‌മണ്യത്തിന്റെ പ്രതികരണം. ഇത്തരത്തില്‍ തീരുവ ചുമത്തിയാല്‍ ഇന്ത്യയും അമേരിക്കയും തമ്മില്‍ വ്യാപാര യുദ്ധമുണ്ടാകുമെന്നും അദ്ദേഹം വ്യക്തമാക്കി. 

ഇന്ത്യയ്ക്കുമേല്‍ തീരുവ ചുമത്തുന്നതിനെ താന്‍ ഒരിക്കലും പിന്തുണയ്ക്കില്ലെന്നും അത് ഒരു വ്യാപാര യുദ്ധത്തിലേക്ക് നയിക്കുമെന്നും യുഎസ് കോണ്‍ഗ്രസ് അംഗം ചൂണ്ടിക്കാട്ടി.

യുഎസ് പ്രസിഡന്റായി തെരഞ്ഞെടുക്കപ്പെടുന്നതിന് മുമ്പ്, ഡോണാള്‍ഡ് ട്രംപ് ഇന്ത്യയുടെ താരിഫ് ഘടനയെ പരിഹസിക്കുകയും ചൈനയും ഇന്ത്യയും പോലുള്ള രാജ്യങ്ങള്‍ക്ക് നികുതി ചുമത്തുന്നതിനെക്കുറിച്ച് സംസാരിക്കുകയും ചെയ്തിരുന്നു.

 ട്രംപ് അമേരിക്കന്‍ പ്രസിഡന്റായി ചുമതലയേല്‍ക്കാനൊരുങ്ങുന്നതോടെ ഇന്ത്യന്‍ കയറ്റുമതിക്ക് കൂടുതല്‍ തീരുവ ചുമത്താനാണ് സാധ്യത. ഇതിന് പിന്നാലെയാണ് ട്രംപ് ഭരണകൂടത്തിന്റെ പദ്ധതികളെ വിമര്‍ശിച്ച് സുഹാസ് സുബ്രഹ്‌മണ്യം രംഗത്തെത്തിയത്. ഇന്ത്യയിലെ വ്യവസായ മേഖലയെയും അദ്ദേഹം പ്രശംസിച്ചു.

ഇന്ത്യയില്‍ മികച്ച രീതിയില്‍ ധാരാളം ബിസിനസുകള്‍ ഉണ്ട്, ധാരാളം ഇന്ത്യന്‍ കമ്പനികള്‍ യുഎസിലേക്ക് വിപുലീകരിക്കുന്നു. അതിനാല്‍ നമ്മുടെ രാജ്യങ്ങള്‍ സാമ്പത്തികമായി എത്രത്തോളം ഒരുമിച്ച് പ്രവര്‍ത്തിക്കുന്നുവോ അത്രത്തോളം നമ്മള്‍ ശക്തരാകും,' എന്ന് സുബ്രഹ്‌മണ്യം പറഞ്ഞു. 

അമേരിക്കയുടെ വിദേശനയം രൂപപ്പെടുത്തുന്നതില്‍ നിര്‍ണായക പങ്ക് വഹിക്കുന്ന ജനപ്രതിനിധി സഭയിലെ അംഗമായി സത്യപ്രതിജ്ഞ ചെയ്യാന്‍ തയ്യാറെടുക്കുന്ന സുബ്രഹ്‌മണ്യം, ലോകമെമ്പാടും ജനാധിപത്യം പ്രോത്സാഹിപ്പിക്കുന്ന ഒരാളാകാന്‍ ആഗ്രഹിക്കുന്നുവെന്നും പറഞ്ഞു.

ഇന്ത്യ ഏറ്റവും വലിയ ജനാധിപത്യ രാജ്യങ്ങളിലൊന്നാണെന്നും, യുഎസ്-ഇന്ത്യ ബന്ധം ഇരു രാജ്യങ്ങള്‍ക്കും വളരെ പ്രധാനമാണെന്നും അദ്ദേഹം ചൂണ്ടിക്കാട്ടി. 

കുടിയേറ്റ സമ്പ്രദായത്തെ കുറിച്ചും അദ്ദേഹം വ്യക്തമാക്കി. ഇമിഗ്രേഷനെ കുറിച്ച് താന്‍ ധാരാളം കേള്‍ക്കുന്നു, പ്രത്യേകിച്ച് എച്ച്-1 ബി വിസയിലുള്ള ആളുകള്‍ പൗരത്വം എടുക്കാന്‍ ശ്രമിക്കുന്നു. തങ്ങള്‍ക്ക് യുണൈറ്റഡ് സ്റ്റേറ്റ്സില്‍ ഒരു ഇമിഗ്രേഷന്‍ സിസ്റ്റം ഓവര്‍ഹോള്‍ ആവശ്യമാണ്. നിയമപരമായ ഇമിഗ്രേഷനില്‍ ശ്രദ്ധ കേന്ദ്രീകരിക്കേണ്ടതുണ്ടെന്നും സുബ്രഹ്‌മണ്യം കൂട്ടിച്ചേര്‍ത്തു.