ഇന്ത്യയില്‍ ഉടനീളം ട്രംപ് ടവറുകള്‍ സ്ഥാപിക്കാനൊരുങ്ങി ട്രംപ്. അടുത്ത ആറ് വര്‍ഷത്തിനുള്ളില്‍ പത്ത് ട്രംപ് ടവറുകള്‍. യു.എസ് കഴിഞ്ഞാല്‍ ഏറ്റവും കൂടുതല്‍ ട്രംപ് ടവറുകള്‍ ഉള്ളത് ഇന്ത്യയില്‍

വാഷിംഗ്ടണ്‍: ട്രംപ് അധികാരത്തിലെത്തിയതിന് പിന്നാലെ അദ്ദേഹത്തിന്റെ റിയല്‍ എസ്റ്റേറ്റ് കമ്പനി ഇന്ത്യയില്‍ കൂടുതല്‍ നിക്ഷേപം നടത്താനൊരുങ്ങുന്നു. ഇന്ത്യയില്‍ ഉടനീളം ട്രംപ് ടവറുകള്‍ സ്ഥാപിക്കാനാണ് നീക്കം.  

മുംബൈ, പൂനെ, ഗുഡ്ഗാവ്, കൊല്‍ക്കത്ത എന്നിവിടങ്ങളിലെ നിലവിലെ നാല് റസിഡന്‍ഷ്യല്‍ ട്രംപ് ടവറുകള്‍ക്ക് പുറമെ അടുത്ത ആറ് വര്‍ഷത്തിനുള്ളില്‍ പത്ത് ട്രംപ് ടവറുകള്‍ ഇന്ത്യയില്‍ സ്ഥാപിക്കാനാണ് പദ്ധതിയിട്ടിരിക്കുന്നത്.

നോയിഡ, ഹൈദരാബാദ്, ബെംഗളൂരു, മുംബൈ, ഗുഡ്ഗാവ്, പൂനെ എന്നിവിടങ്ങളിലായി പുതിയ ടവറുകള്‍ സ്ഥാപിക്കാനാണ് ആസൂത്രണം ചെയ്തിരിക്കുന്നത്. ഇവ നടപ്പിലായാല്‍ അമേരിക്കയെ മറികടന്ന് ആഗോളതലത്തില്‍ ഏറ്റവും കൂടുതല്‍ ട്രംപ് ടവറുകള്‍ ഉള്ള രാജ്യമായി ഇന്ത്യ മാറും. നിലവില്‍ യു.എസ് കഴിഞ്ഞാല്‍ ഏറ്റവും കൂടുതല്‍ ട്രംപ് ടവറുകള്‍ ഉള്ളത് ഇന്ത്യയിലാണ്.

2017ല്‍ ഡൊണാള്‍ഡ് ട്രംപ് പ്രസിഡന്റായി ചുമതലയേറ്റെടുക്കുന്നതിന് മുമ്പ് ലോധ, പഞ്ച്ഷില്‍, ട്രിബേക്ക ഡെവലപ്പേഴ്സ് തുടങ്ങിയ കമ്പനികളുമായി ചേര്‍ന്ന് മുംബൈ, പൂനെ, ഗുഡ്ഗാവ്, കൊല്‍ക്കത്ത എന്നിവിടങ്ങളില്‍ നാല് ട്രംപ് ടവറുകള്‍ സ്ഥാപിക്കാന്‍ ട്രംപിന്റെ കമ്പനി ലൈസന്‍സ് നല്‍കിയിരുന്നു.