പുൽപ്പള്ളി ബാങ്ക് തട്ടിപ്പ്; മുൻ കോൺ​ഗ്രസ് നേതാവ് സജീവൻ കൊല്ലപ്പിള്ളിയുടെ അറസ്റ്റിന് പിന്നാലെ കൂടുതൽ പേരിലേക്ക് അന്വേഷണം വ്യാപിപ്പിക്കാൻ ഇഡി

വയനാട്: പുല്‍പ്പള്ളി സര്‍വീസ് സഹകരണ ബാങ്ക് ക്രമക്കേടില്‍ സേവാദള്‍ മുന്‍ ജില്ലാ വൈസ് ചെയര്‍മാന്‍ സജീവന്‍ കൊല്ലപ്പിള്ളിയുടെ അറസ്റ്റിന് പിന്നാലെ കൂടുതല്‍ പേരിലേക്ക് അന്വേഷണം വ്യാപിപ്പിക്കാന്‍ എന്‍ഫോഴ്‌സ്‌മെന്റ് ഡയറക്ടറേറ്റ്.

ബാങ്ക് ഭരണസമിതി മുന്‍ പ്രസിഡന്റ് കെകെ എബ്രഹാമടക്കമുള്ളവരെ ചോദ്യം ചെയ്യാന്‍ വിളിച്ചുവരുത്തുകയോ കസ്റ്റഡിയിലെടുക്കുകയോ ചെയ്യുമെന്നാണ് സൂചന. വായ്പ തട്ടിപ്പിന് ഇടനിലക്കാരനായി കള്ളപ്പണം വെളുപ്പിച്ചുവെന്നാണ് സജീവനെതിരായ ഇ ഡിയുടെ കണ്ടെത്തല്‍.

കെപിസിസി മുന്‍ ജനറല്‍ സെക്രട്ടറിയും ക്രമക്കേട് നടന്ന കാലയളവില്‍ ബാങ്കിന്റെ പ്രസിഡന്റുമായിരുന്ന കെകെ എബ്രഹാമിന്റെ വിശ്വസ്തനാണ് അറസ്റ്റിലായ സജീവന്‍ കൊല്ലപ്പിള്ളി.

 ക്രമക്കേട് നടന്ന കാലയളവില്‍ ബാങ്കില്‍ ഈ സ്വാധീനം ഉപയോഗിച്ചാണ് സൈ്വരവിഹാരം നടത്തിയതെന്ന് അന്വേഷണത്തില്‍ വ്യക്തമായിട്ടുണ്ട്. വായ്പാക്രമക്കേടില്‍ സജീവന്റെ നിര്‍ണായക പങ്കാണ് ഇ ഡി സ്ഥിരീകരിച്ചിരിക്കുന്നത്.

കൊല്ലപ്പള്ളിയെ ചോദ്യംചെയ്യാന്‍ മൂന്ന് ദിവസത്തെ കസ്റ്റഡിയാണ് ഇഡിയ്ക്ക് കോടതി അനുവദിച്ചിട്ടുള്ളത്. ക്രമക്കേട് നടത്തിയ തുകയില്‍ ഒന്നരക്കോടിയോളം രൂപ സജീവന്‍ കൊല്ലപ്പള്ളിയുടെ അക്കൗണ്ടില്‍ എത്തിയിട്ടുണ്ടെന്നാണ് ഇഡിയുടെ കണ്ടെത്തല്‍.

ഈ സാഹചര്യത്തിലാണ് ബാങ്ക് ഭരണസമിതി അംഗങ്ങളെയും ഉദ്യോഗസ്ഥരെയും നോട്ടീസ് അയച്ച് വിളിച്ചുവരുത്താന്‍ ഈ ഡി നീക്കം നടത്തുന്നത്.