സംസ്ഥാനത്തെ ഹൈസ്‌കൂൾ അധ്യാപകർക്ക് ബാലാവകാശ കമ്മിഷന്റെ പരിശീലനം

കോട്ടയം: സംസ്ഥാനത്തെ ഹൈസ്‌കൂൾ അധ്യാപകർക്ക് ബാലാവകാശ കമ്മിഷൻ നൽകുന്ന രണ്ടാം ഘട്ട ഏകദിന പരിശീലനത്തിന്റെ ജില്ലാതല ഉദ്ഘാടനം ഏറ്റുമാനൂർ ചൈതന്യ പാസ്റ്ററൽ സെന്ററിൽ വ്യാഴാഴ്ച (സെപ്റ്റംബർ 25) രാവിലെ 10 മണിക്ക് കമ്മിഷൻ അംഗം കെ.കെ. ഷാജു കോട്ടയം നിർവഹിക്കും.

ഒക്ടോബർ ആറിന് അവസാനിക്കുന്ന രണ്ടാംഘട്ട പരിശീലനം  ഇടുക്കി, എറണാകുളം, ആലപ്പുഴ, കോട്ടയം, പത്തനംതിട്ട, കൊല്ലം, തിരുവനന്തപുരം ജില്ലകളിലെ അധ്യാപകർക്കാണ് നൽകുന്നത്. കുട്ടികളുടെ അവകാശങ്ങൾ, മാനസികാരോഗ്യം, ആർട്ടിഫിഷ്യൽ ഇന്റലിജൻസ്, സൈബർ സുരക്ഷ തുടങ്ങിയ വിഷയങ്ങളിൽ വിദഗ്ധർ പരിശീലനം നൽകും. ഒന്നാം ഘട്ടം കോഴിക്കോട്, കാസർകോട്, കണ്ണൂർ, മലപ്പുറം, വയനാട്, പാലക്കാട്, തൃശൂർ ജില്ലകളിൽ ഓഗസ്റ്റ് 11 മുതൽ 20വരെ സംഘടിപ്പിച്ചിരുന്നു.

 കൗമാരക്കാരുടെ ശാരീരികവും മാനസികവും വൈകാരികവുമായ പ്രശ്‌നങ്ങൾ നേരിടാൻ അവരെ പ്രാപ്തരാക്കാനും സാമൂഹ്യ മാധ്യമ സാക്ഷരത, സുരക്ഷിതമായ ഇന്റർനെറ്റ് ഉപയോഗം, സൈബർ സെക്യൂരിറ്റി തുടങ്ങിയ വിഷയങ്ങളിൽ അവബോധം വളർത്തുകയുമാണ് പരിശിലനം ലക്ഷ്യമിടുന്നത്.