കുരുന്നുകളുടെ ചിന്തകൾ പത്രമായി — ‘കിലുക്കാംപെട്ടി’ പ്രകാശനം ചെയ്തു

പനമണ്ണ: പനമണ്ണ യു.പി. സ്‌കൂളിലെ ഒന്നാം ക്ലാസ് വിദ്യാർത്ഥികൾ തങ്ങളുടെ സർഗ്ഗാത്മകതയും കഴിവുകളും കൈയെഴുത്തിലൂടെ അക്ഷരരൂപത്തിലാക്കി തയ്യാറാക്കിയ ‘കിലുക്കാംപെട്ടി’ എന്ന കുട്ടിപ്പത്രം പ്രകാശനം ചെയ്തു.

തികച്ചും കുട്ടികൾ തന്നെ കൈയെഴുത്തായി തയ്യാറാക്കിയ ഈ സവിശേഷ പത്രം സ്‌കൂൾ ഹെഡ്മിസ്ട്രസ്സ് ബീന.പി ക്ക് നൽകിയാണ് പ്രകാശനകർമ്മം നിർവ്വഹിച്ചത്.

സ്കൂൾ വാർത്തകളും കുട്ടികളുടെ ലേഖനങ്ങളും ചിത്രങ്ങളും ഉൾപ്പെടുത്തിയാണ് ഈ കൈയെഴുത്ത് കുട്ടിപ്പത്രം തയ്യാറാക്കിയിരിക്കുന്നത്.

പത്രത്തിലെ ചിത്രീകരണം ഒന്നാം ക്ലാസ് വിദ്യാർത്ഥിയായ അക്ഷരയുടെ പിതാവ് രാമചന്ദ്രൻ നിർവ്വഹിച്ചു.

പനമണ്ണ യു.പി. സ്‌കൂളിലെ ഒന്നാം ക്ലാസ് ‘ഒന്നാന്തരം’ എന്ന പദ്ധതിയുടെ ഭാഗമായി നടത്തുന്ന ഈ പ്രവർത്തനത്തിലൂടെ, കൈയെഴുത്ത് പത്രനിർമ്മാണം വിദ്യാർത്ഥികളിൽ വായനാശീലവും എഴുത്തുപരമായ കഴിവുകളും വളർത്താൻ സാധ്യമാകുന്നുണ്ടെന്ന് ക്ലാസ് ടീച്ചർ മുബഷിറ അഭിപ്രായപ്പെട്ടു.