ശ്രീധന്വന്തരിയ്ക്ക് തോട്ടുവാ ഔഷധതീർത്ഥത്തിൽ ആറാട്ട്

പെരുമ്പാവൂർ: ഔഷധവിജ്ഞാനീയത്തെയും പ്രയോഗത്തെയും രണ്ടായി വിഭജിച്ച പ്രാചീന വൈദ്യപ്രതിഭയായ മഹാവിഷ്ണുവിന്റെ അവതാരം കൂടിയായ ധന്വന്തരിമൂർത്തിയ്ക്ക് തോട്ടുവാ തീർത്ഥത്തിൽ ആറാട്ട് നടന്നു.

ഇക്കൊല്ലത്തെ ഉത്സവത്തിന്റെ ആറാം  ദിവസം തോട്ടുവാ തോട്ടിൽ നടന്ന ആറാട്ടിന് തന്ത്രി ചേലാമറ്റം തോട്ടാമറ്റം സുബ്രഹ്മണ്യൻ നമ്പൂതിരി കാർമ്മികത്വം വഹിച്ചു. സർവ്വരോഗശമനത്തിനായി പെരിയാറിന്റെ കൈവഴിയായി ഒഴുകിയെത്തുന്ന തോട്ടുവാ തോട്ടിലെ ഔഷധസമാനമായ ജലത്തിൽ ഭക്തർ കുളിച്ചു തൊഴുന്നത് ഇവിടെ പതിവാണ്.

സംസ്ഥാനത്തിന്റെ വിവിധയിടങ്ങളിൽ നിന്നും പ്രശസ്തരായ ആയുർവ്വേദ ഭിഷഗ്വരന്മാരും ഡോക്ടർമാരും ധന്വന്തരിയെ വന്നു തൊഴുതു പോകാറുണ്ട്. ഡിസംബർ 17 മുതൽ 27 വരെ നടക്കുന്ന ദശാവതാരം ചന്ദനം ചാർത്തൽ ദർശിയ്ക്കാൻ നൂറുകണക്കിന് ഭക്തരെത്തും.