അട്ടപ്പാടി പുതൂരിൽ ഉൽസവ പ്രാരംഭം; കൊടിയേറ്റം 6 ന്

 അട്ടപ്പാടി: അട്ടപ്പാടിയിലെ പ്രധാന ദേവീ ക്ഷേത്രമായ ശ്രീ പുതൂർ മാരിയമ്മൻ ക്ഷേത്രത്തിൽ അൻപത്തിരണ്ടാം വാർഷിക മഹോൽസവത്തിൻ്റെ പ്രാരംഭ  ചടങ്ങുകൾ വിശേഷമായി നടന്നു. ചൊവ്വാഴ്ച്ച രാവിലെ ഉൽസവം വിളംബരം ചെയ്യുന്നതിൻ്റെ ഭാഗമായി  പരമ്പരാഗതമായ  രീതിയിൽ "പൂച്ചാട്ട് " , "പൊരിച്ചാട്ട്" ചടങ്ങുകൾ ഭക്ത്യാദരപൂർവ്വം നടന്നു.  

രാവിലെ ചെമ്പവട്ടക്കാടിൽ നിന്നും  അവിടുത്തെ ക്ഷേത്രത്തിൽ സവിശേഷ അലങ്കാര അഭിഷേക പൂജകൾ കഴിഞ്ഞ് പുതൂർ  മാരിയമ്മൻ ദേവിയ്ക്കും ഉപദേവൻമാർക്കും  പൂക്കളും മാലകളുമായി കാർമ്മികർ എത്തി. പുതൂർ മല്ലീശ്വരൻ ക്ഷേത്രത്തിൽ പ്രത്യേക പൂജ നടത്തി കാർമ്മികരെ ആനയിച്ചു . മാരിയമ്മൻ ദേവി ക്ഷേത്രത്തിൽ എത്തിച്ചേർന്ന ഉടൻ ദേവി ദേവൻമാർക്ക് മാലകൾ   അണിയിച്ച്  ഉൽസവ പ്രഖ്യാപനം   നടത്തി. 

തുടർന്ന് വിവിധ ദേശങ്ങളിൽ വാദ്യമേളത്തോടെ ഉൽസവ  വിളംബരം നടത്തി. വൈകുന്നേരം വിവിധ ദേശങ്ങളിൽ നിന്നും  "പൊരി" കൊണ്ടു വന്നു. "പൊരിച്ചാട്ട് " എഴുന്നള്ളിപ്പും നടന്നു. ശേഷം  അമ്മയ്ക്കും തുടർന്ന്  ഉപദേവ ൻമാർക്കും പൊരി സമർപ്പണം ചെയ്യുന്ന ചടങ്ങോടുകൂടി  ഉൽസവത്തിന് പ്രാരംഭം കുറിക്കൽ പൂർത്തിയായി. ഇതോടുകൂടി ഭക്തരുടെ  വ്രതാഷ്ഠാനത്തിന് തുടക്കമായി.  മെയ് 6 മുതൽ മെയ് 16 വരെ ഉൽസവം നടക്കും.