കനകക്കുന്നില്‍ തിരക്കേറുന്നു; സന്ദര്‍ശകരെ ആകര്‍ഷിച്ച് വസന്തോല്‍സവം

ടൂറിസം വകുപ്പ് ജില്ലാ ടൂറിസം പ്രൊമോഷന്‍ കൗണ്‍സിലുമായി ചേര്‍ന്ന് സംഘടിപ്പിച്ച പന്ത്രണ്ട് ദിവസത്തെ വസന്തോത്സവവും ലൈറ്റ് ഷോയും ഡിസംബര്‍ 24 നാണ് കനകക്കുന്ന് കൊട്ടാരം ഗ്രൗണ്ടില്‍ ആരംഭിച്ചത്.

നഗരം ഇതുവരെ കണ്ടിട്ടുള്ളതില്‍ വച്ച് ഏറ്റവും മികച്ച പുഷ്പപ്രദര്‍ശനമാണ് ഇത്തവണത്തേതെന്നാണ് സന്ദര്‍ശകരുടെ അഭിപ്രായം. പൂച്ചെടികളുടെ ശേഖരത്തിലും വൈപുല്യത്തിലും ക്രമീകരിച്ച രീതിയിലുമെല്ലാം മികവ് പ്രകടമാണെന്ന് അവര്‍ പറയുന്നു.

വെള്ളിയാഴ്ച വസന്തോത്സവത്തില്‍ എത്തിയ ഒമ്പത് വയസ്സുകാരി ആരാധ്യയ്ക്ക് ഫോട്ടോഗ്രാഫിയിലെ തന്‍റെ കഴിവുകള്‍ പുറത്തെടുക്കാന്‍ മികച്ച അവസരമാണ് വസന്തോത്സവത്തില്‍ കൈവന്നത്. കവടിയാര്‍ ക്രൈസ്റ്റ് നഗര്‍ സ്കൂളിലെ നാലാം ക്ലാസ് വിദ്യാര്‍ത്ഥിനിയായ ആരാധ്യ നായര്‍ വന്യജീവി ഫോട്ടോഗ്രാഫറായ മുത്തച്ഛന്‍ രതീഷ് കുമാറിനൊപ്പമാണ് കനകക്കുന്നിലെത്തിയത്.

വസന്തോല്‍സവത്തില്‍ വിവിധതരം പൂക്കളും ചെടികളും കാണാനും അവയെക്കുറിച്ച് കൂടുതലറിയാനും സാധിച്ചുവെന്ന് ആരാധ്യ പറഞ്ഞു. ക്രിസ്മസ് അവധി കഴിഞ്ഞ് സ്കൂളില്‍ എത്തുമ്പോള്‍ എടുത്ത ചിത്രങ്ങള്‍ കൂട്ടുകാര്‍ക്ക് കാണിച്ചു കൊടുക്കും. കഴിഞ്ഞ വര്‍ഷവും വസന്തോത്സവം കാണാന്‍ വന്നിരുന്നു. എന്നാല്‍ ഇത്തവണ ദീപാലങ്കാരങ്ങളുടെയും പൂക്കളുടെയും ചിത്രങ്ങള്‍ പകര്‍ത്തുന്നത് വേറിട്ട അനുഭവം നല്‍കുന്നുവെന്നും ആരാധ്യ കൂട്ടിച്ചേര്‍ത്തു.

'ഇലുമിനേറ്റിംഗ് ജോയ് സ്പ്രെഡ്ഡിംഗ് ഹാര്‍മണി' എന്ന ആശയത്തിലാണ് ജനുവരി 4 വരെ നടക്കുന്ന വസന്തോത്സവം പരിപാടി സംഘടിപ്പിച്ചിട്ടുള്ളത്. വൈവിധ്യമാര്‍ന്ന ഇലുമിനേഷനുകളും ഇന്‍സ്റ്റലേഷനുകളും കൊണ്ട് കനകക്കുന്ന് കൊട്ടാരവളപ്പിനെ അലങ്കരിക്കുന്ന തരത്തിലാണ് ദീപാലങ്കാരങ്ങളും ഒരുക്കിയിട്ടുള്ളത്. ഇതിന്‍റെ ഭാഗമായുള്ള ലൈറ്റ് ഷോ തലസ്ഥാന നഗരത്തെ പ്രകാശപൂരിതമാക്കും.

പാലോട് ജവഹര്‍ലാല്‍ നെഹ്റു ട്രോപ്പിക്കല്‍ ബൊട്ടാണിക്കല്‍ ഗാര്‍ഡന്‍ ആന്‍ഡ് റിസര്‍ച്ച് ഇന്‍സ്റ്റിറ്റ്യൂട്ട് ക്യുറേറ്റ് ചെയ്ത പുഷ്പമേളയില്‍ രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള 35000 പൂച്ചെടികളാണ് ഒരുക്കിയിട്ടുള്ളത്. 8000-ത്തില്‍ പരം ക്രിസാന്തെമം ചെടികള്‍ കൊണ്ട് ഒരുക്കുന്ന ക്രിസാന്തെമം ഫെസ്റ്റിവല്‍ ഈ വര്‍ഷത്തെ പ്രധാന ആകര്‍ഷണീയതയാണ്. വസന്തോത്സവത്തിനോട് അനുബന്ധിച്ച് കനകക്കുന്ന് കൊട്ടാരത്തില്‍ പുഷ്പാലങ്കാര പ്രദര്‍ശനവും മത്സരവും ഒരുക്കിയിട്ടുണ്ട്.

ഡാലിയ, പെറ്റുനിയ, ജമന്തി, റോസ്, ഓര്‍ക്കിഡ്, തെറ്റി ഇംപേഷ്യന്‍സ്, സീനിയ, ഡെയ്സി തുടങ്ങി പുഷ്പസസ്യങ്ങളുമുണ്ട്. കൂടാതെ പ്രാദേശികമായ പൂക്കളുടെയും ചെടികളുടെയും വലിയ ശ്രേണിയും പ്രദര്‍ശനത്തിന്‍റെ ഭാഗമാണ്. കുട്ടികള്‍ക്കും മുതിര്‍ന്നവര്‍ക്കുമായി വിവിധ വിഭാഗങ്ങളില്‍ മത്സരങ്ങള്‍ ഉണ്ടായിരിക്കുന്നതാണ്. വിവിധ നഴ്സറികള്‍ ഒരുക്കുന്ന സ്റ്റാളുകളില്‍ നിന്ന സന്ദര്‍ശകര്‍ക്ക് പൂക്കളും ചെടികളും വാങ്ങാം.

ഫ്ളവര്‍ ഷോയ്ക്കു പുറമേ ട്രെഡ് ഫെയര്‍, ഫുഡ് കോര്‍ട്ട്, അമ്യൂസ്മെന്‍റ് പാര്‍ക്ക്, കലാപരിപാടികള്‍ എന്നിവയും വസന്തോത്സവത്തിന്‍റെ ഭാഗമാണ്. മുതിര്‍ന്നവര്‍ക്ക് 50 രൂപ, കുട്ടികള്‍ക്ക് 30 രൂപ എന്നിങ്ങനെയാണ് പ്രവേശന നിരക്ക്.