അയ്യപ്പഭക്തിലഹരിയിൽ ആറാടി കൂടാലപ്പാട് ഗ്രാമം; ദേശവിളക്കിന്റെ പ്രചരണാർത്ഥം ഭവനസന്ദർശനം തുടങ്ങി

പെരുമ്പാവൂർ: കൂടാലപ്പാട് ദേശവിളക്കുത്സവത്തിനു ഏതാനും ആഴ്ചകൾ മാത്രം ബാക്കി നിൽക്കെ കൂടാലപ്പാട് ഗ്രാമത്തിൽ ആബാലവൃദ്ധം അയ്യപ്പഭക്തരും ഭക്തിയുടെ ആവേശക്കൊടുമുടിയിൽ ആണ്. ഡിസംബർ 2 ശനിയാഴ്ചയാണ് മദ്രാസ് കവല - കൂടാലപ്പാട് ചർച്ച് റോഡിൽ പഞ്ചായത്ത് കിണറിനു സമീപമാണ് ദേശവിളക്ക്.  ഉദയം നഗറിൽ അയ്യപ്പ സേവാസംഘം രണ്ടാം വർഷമാണ് ദേശവിളക്കു സംഘടിപ്പിയ്ക്കുന്നത്. കഴിഞ്ഞ ഒരാഴ്ചയായി ഗ്രാമത്തിലെങ്ങും വ്രതവിശുദ്ധിയുടെ നേർക്കാഴ്ചകളാണ്.

ദേശവിളക്കിനു മുന്നോടിയായി സ്ഥാപിച്ച കമ്മിറ്റി ഓഫീസിന്റെ ഉദ്‌ഘാടനം ദീപാവലി നാളിൽ നടന്നു. സ്ത്രീപങ്കാളിത്തത്തോടെ അവധിദിനങ്ങളിൽ ദേശവിളക്കിന്റെ 
പ്രചരണത്തിനായി ചെറുപ്പക്കാർ വീടുവീടാന്തരം കയറിയിറങ്ങുകയാണ്. ഹൈന്ദവ-ക്രൈസ്തവ സാഹോദര്യത്തിന്റെ ഊഷ്മളസൗഹൃദം നിലനിൽക്കുന്ന കൂടാലപ്പാട് ദേശത്ത് എല്ലാവിഭാഗമാളുകളും ദേശവിളക്കിന്റെ വിജയത്തിനായി ആത്മാർത്ഥമായി സഹകരിയ്ക്കുന്നുണ്ടെന്ന് സംഘാടകർ പറഞ്ഞു. 

ദീപാവലി നാളിൽ ദീപാലങ്കൃതമാക്കിയ ഓഫീസ് പരിസരത്ത് ഭക്തരൊത്തുകൂടി അയ്യപ്പനാമഘോഷം മുഴക്കി ഭക്തിമയമാക്കി. ദേശവിളക്കുനാളിൽ മലയാത്രയ്‌ക്കൊരുങ്ങുന്നവരെല്ലാം വൈകുന്നേരങ്ങളിൽ നിത്യവും ഒത്തുകൂടുന്നത് പതിവാക്കി. വൃശ്ചികം ഒന്നിന് വൈകിട്ട് കമ്മിറ്റി ഓഫീസിൽ പ്രത്യേക ദീപക്കാഴ്ചയും  
മറ്റും സംഘടിപ്പിച്ചിട്ടുണ്ട്.