പെരുമ്പാവൂർ അയ്യപ്പക്ഷേത്രത്തിൽ ഭക്തജനത്തിരക്കു തുടങ്ങി; ശബരിമല ഇടത്താവളം ഉദ്‌ഘാടനം ചെയ്തു

പെരുമ്പാവൂർ: പെരുമ്പാവൂർ പട്ടണമധ്യത്തിലെ ചരിത്രപ്രസിദ്ധമായ ശ്രീധർമ്മശാസ്താക്ഷേത്രത്തിൽ വൃശ്ചികം ഒന്നിന് സന്ധ്യയ്ക്ക് ചുറ്റുവിളക്കോടെ മഹാദീപാരാധന നടന്നു.

മണ്ഡലമാസത്തിലെ ആദ്യദിനം തന്നെ ഭക്തജനങ്ങളുടെ നല്ല തിരക്കായിരുന്നു. തിരുവിതാംകൂർ ദേവസ്വം ബോർഡിനു കീഴിലുള്ള ഈ ക്ഷേത്രം വടക്കുദിക്കിൽ നിന്നുള്ള ഭക്തരുടെ പ്രധാന ഇടത്താവളങ്ങളിൽ ഒന്നാണ്.

വെള്ളിയാഴ്ച വൈകീട്ടു മുതൽ കെട്ടുനിറ നടക്കുന്നുണ്ട്. ഗുരുസ്വാമിമാരുടെ ഒരു സംഘം എല്ലാവർഷവും ഇതിനായി ഇവിടെ ഉണ്ടാകാറുണ്ട്. അഖിലഭാരത അയ്യപ്പസേവാസംഘത്തിന്റെ പ്രത്യേക ബസ്സ് ആദ്യദിവസം തന്നെ ശബരിമല സർവ്വീസ് ആരംഭിച്ചു. ക്ഷേത്രച്ചടങ്ങുകൾക്കു ശേഷം സംഗീതാരാധനയും ചിന്തുപാട്ടും ഉണ്ടായിരുന്നു.