'ബുൾബുൾ തരംഗ്, ദി ഭാരത് തരംഗ് ' ഡോക്യുമെന്ററി പ്രകാശനം കൊച്ചി ചങ്ങമ്പുഴ സാംസ്കാരിക കേന്ദ്രത്തില്‍ ഒക്ടോബർ 23 ന്

കൊച്ചി: ഇന്ത്യയുടെ സംഗീത പൈതൃകത്തെ ആഘോഷിക്കുന്ന, ഗതകാല പ്രൗഢിയുടെ തന്ത്രിവാദ്യമായ ബുൾബുൾ തരംഗ് എന്ന സംഗീതോപകരണത്തിനുള്ള ഒരു സമര്‍പ്പണമായി സനു സത്യന്‍ രചനയും സംവിധാനവും നിര്‍വ്വഹിച്ച് ആപ്തഭാരതി ഫൗണ്ടേഷനും ഭാരത്  തരംഗും ചേര്‍ന്നു നിര്‍മ്മിച്ച ഡോക്യുമെന്‍ററി. 

ബുൾബുൾ തരംഗ്, ദി ഭാരത് തരംഗ് എന്ന ഡോക്യുമെന്‍ററിയുടെ പ്രകാശനോദ്ഘാടനം ഒക്ടോബർ 23ന് വൈകിട്ട് 6.30ന്, ചങ്ങമ്പുഴ സംസ്കാരിക കേന്ദ്രത്തിൽ കൊച്ചി ചാവറ കള്‍ച്ചറല്‍ സെന്റര്‍ ഡയറക്‌ടറും സിനിമ സംവിധായകനുമായ ഫാദര്‍ അനില്‍ ഫിലിപ്പ് സിഎംഐ നിര്‍വ്വഹിക്കും. 

സനൽ പോറ്റിയും ഉല്ലാസ്  പൊന്നാടിയും ചേര്‍ന്നവതരിപ്പിക്കുന്ന ഈ ഡോക്യുമെന്ററി, ഇന്ത്യയുടെ സമൃദ്ധമായ സംഗീത പൈതൃകത്തെയും ബുള്‍ ബുള്‍ തരംഗിന്റെ പുനരുജ്ജീവനത്തെയും അടയാളപ്പെടുത്തുന്നു.

ചിത്രത്തിൽ ഉല്ലാസ്  പൊന്നാടിക്കൊപ്പം വിശ്രുത ബുള്‍ബുള്‍ തരംഗ്‌ വാദകാരായ റഷീദ് ഖാൻ, രാജേന്ദ്ര നായിക്, പുരുഷോത്തമ കാമത്ത് എന്നിവർ ഉൾപ്പെടെയുള്ള പ്രമുഖ ബുള്‍ ബുള്‍ തരംഗ് സംഗീതജ്ഞരുടെ ആവിഷ്കാരങ്ങളും ഉൾപ്പെടുത്തിയിട്ടുണ്ട്.

ജാപ്പനീസ് തൈഷോഗോട്ടോ എന്ന ഉപകരണത്തിൽ നിന്നാരംഭിച്ച്, ഇന്ത്യയിൽ ബുൾബുൾ തരംഗ് അല്ലെങ്കിൽ ശാഹി ബാജാ എന്ന പേരിൽ വികസിച്ച സംഗീതോപകരണത്തിന്റെ ചരിത്രയാത്രയും അതിന്റെ കലാപൈതൃകവും മനോഹരമായി ചിത്രീകരിക്കുന്നു.

ആപ്തഭാരതി ഫൗണ്ടേഷന്റെയും ഭാരത് തരംഗിന്റെയും നേതൃത്വത്തില്‍ ആവിഷ്കരിച്ച  സംസ്കാരിക ചലച്ചിത്ര പരമ്പരയുടെ ഭാഗമായാണ് ഈ ഡോക്യുമെന്ററി ഒരുക്കിയിരിക്കുന്നത്.

ഇന്ത്യൻ തനത് സംഗീത പൈതൃകത്തിന്റെ പുനർജന്മത്തെയും സംസ്കാരിക പാരമ്പര്യത്തെയും ആഘോഷിക്കുന്ന ഈ ഡോക്യുമെന്ററി സംഗീതാസ്വാദകർക്ക് അപൂർവമായ അനുഭവമാകുമെന്ന് സംഘാടകർ അറിയിച്ചു.

കൂടുതല്‍ വിവരങ്ങള്‍ക്ക് സനു സത്യനെ 81370 33177 എന്ന നമ്പറില്‍ ബന്ധപ്പെടാവുന്നതാണ്.