മലബാർ എക്‌സ്പ്രസിൽ പോലീസുകാരനെ കുത്തിപ്പരുക്കേൽപ്പിച്ച പ്രതി പിടിയിൽ. ടിക്കറ്റില്ലാതെ യാത്ര ചെയ്ത പ്രതിയെ ടി.ടി.ഇ പിടികൂടിയിരുന്നു. തുടർന്ന് പോലീസിനെ വിളിച്ചു വരുത്തിയപ്പോൾ കത്തിയെടുത്തു വീശുകയായിരുന്നു. പോലീസ് ഉദ്യോഗസ്ഥന്റെ വയറിലാണ് കുത്തേറ്റത്

കോട്ടയം: മലബാർ എക്‌സ്പ്രസ് ട്രെയിനിൽ പോലീസുകാരനെ കുത്തിപ്പരുക്കേൽപ്പിച്ച പ്രതി പിടിയിൽ. പത്തനംതിട്ടകൊടുമൺ സ്വദേശി അനിൽകുമാർ എന്ന പ്രതിയെ റെയിൽവേ പോലീസ് സ്റ്റേഷൻ ഹൗസ് ഓഫിസർ റെജി പി.ജോസഫിന്റെ നേതൃത്വത്തിലുള്ള സംഘമാണ് അറസ്റ്റ് ചെയ്തത്.

ഇന്നലെ രാത്രി പത്തുമണിയോടെ മലബാർ എക്സ്പ്രസിൽ ടിക്കറ്റില്ലാതെ യാത്ര ചെയ്ത പ്രതിയെ ടിക്കറ്റ് പരിശോധകൻ ചോദ്യം ചെയ്യുകയായിരുന്നു.

തുടർന്ന്, ടിക്കറ്റില്ലെന്ന് കണ്ടെത്തിയതോടെ ടിടിഇ ട്രെയിനിൽ ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥനെ വിളിച്ചു വരുത്തി.

തുടർന്ന് പോലീസ് ഉദ്യോഗസ്ഥൻ ഇയാളുമായി സംസാരിക്കുന്നതിനിടെ കത്തി എടുത്ത് വീശുകയായിരുന്നു. പോലീസ് ഉദ്യോഗസ്ഥന്റെ വയറിലാണ് കുത്തേറ്റത്.

എറണാകുളത്തെ ആശുപത്രിയിൽ പോലീസ് ഉദ്യോഗസ്ഥൻ ചികിത്സ തേടി. ഇതിനിടെ കൂടുതൽ പോലീസ് സംഘം എത്തി പ്രതിയെ പിടികൂടി. ഇയാളെ സ്‌റ്റേഷനിൽ എത്തിച്ചിട്ടുണ്ട്. പോലീസ് ഉദ്യോഗസ്ഥന്റെ പരുക്ക് ഗുരുതരമല്ല.