റഷ്യയുടെയും ചൈനയുടെയും ജനാധിപത്യം ഇന്ത്യയിലും വരും, വ്ളാദിമി‍ർ പുടിൻ ആയിക്കൊണ്ടിരിക്കുകയാണ് മോദി; തന്നെ എതിർക്കുന്ന മുഴുവൻ പേരെയും അടിച്ചൊതുക്കാനാണ് ശ്രമിക്കുന്നത്; കെജ്‍രിവാൾ ജനങ്ങൾക്ക് പ്രിയപ്പെട്ട മുഖ്യമന്ത്രിയാണെന്ന് ചെന്നിത്തല

കോഴിക്കോട്: കെജ്‍രിവാളിൻ്റെ അറസ്റ്റ് ജനാധിപത്യത്തിലെ കറുത്ത അധ്യായമെന്ന് കോൺ​ഗ്രസ് നേതാവ് രമേശ് ചെന്നിത്തല. ജനാധിപത്യത്തെ പൂർണമായി തകർക്കാൻ ശ്രമം നടക്കുന്നുണ്ട്. തന്നെ എതിർക്കുന്ന മുഴുവൻ പേരെയും അടിച്ചൊതുക്കാനാണ് മോദി ശ്രമിക്കുന്നത്. കെജ്‍രിവാൾ ജനങ്ങൾക്ക് പ്രിയപ്പെട്ട മുഖ്യമന്ത്രിയാണെന്നും ചെന്നിത്തല പറഞ്ഞു.

ഇൻഡ്യ മുന്നണിയിലെ കക്ഷിയായതിന് പിന്നാലെയാണ് കെജ്‍രിവാളിന്റെ ഈ അറസ്റ്റ്. പ്രതിപക്ഷ കക്ഷികളെ അടിച്ചമർത്തുന്ന നിലപാടാണ് സർക്കാരിൻ്റേത്. കോൺഗ്രസിൻ്റെ അക്കൗണ്ടുകൾ മരവിപ്പിച്ചത് പാടില്ലാത്ത നടപടിയാണ്. പണമില്ലാത്തതിനാൽ എങ്ങനെ മാധ്യമങ്ങളിൽ പരസ്യം കൊടുക്കും? എങ്ങനെ പ്രചാരണത്തിന് പണം കണ്ടെത്തും?

കോർപറേറ്റുകൾ വൻ തോതിൽ ബിജെപിയെ സഹായിക്കുകയാണ്. മോദി വീണ്ടും അധികാരത്തിൽ വന്നാൽ ഭീകരമായ അവസ്ഥയുണ്ടാകുമെന്നും ചെന്നിത്തല പറഞ്ഞു.

റഷ്യയുടെയും ചൈനയുടെയും ജനാധിപത്യം ഇവിടെയും വരുമെന്നും റഷ്യൻ പ്രസിഡന്റ് വ്ളാദിമി‍ർ പുടിൻ ആയിക്കൊണ്ടിരിക്കുകയാണ് മോദിയെന്നും അദ്ദേഹം പറഞ്ഞു.