രാഷ്ട്രീയ സമ്മർദങ്ങൾക്ക് കീഴടങ്ങില്ല; റബർ വിലയിൽ കർഷകർക്ക് അനുകൂലമായ തീരുമാനം ഇല്ലെങ്കിൽ കേന്ദ്ര സർക്കാരിനെതിരെ സമര പരിപാടികൾ സംഘടിപ്പിക്കുമെന്ന് താമരശേരി ബിഷപ്പ്

കോഴിക്കോട്: റബർ വില വർധിപ്പിച്ചില്ലെങ്കിൽ കേന്ദ്രത്തിനെതിരെ ശക്തമായ പ്രതിഷേധം ഉയർത്തുമെന്ന് താമരശേരി ബിഷപ്പ്. സമയബന്ധിതമായി അനുകൂല തീരുമാനം കേന്ദ്ര സർക്കാർ കൈകൊണ്ടില്ലെങ്കിൽ സമരത്തിലേക്ക് കടക്കുമെന്നും താമരശേരി രൂപത ബിഷപ് റെമിജിയോസ് ഇഞ്ചനാനിയിൽ പറഞ്ഞു. 

കാർഷിക പ്രശ്നങ്ങളിൽ കർഷക സംഘടനകളെ ഒരുമിച്ച് നിർത്തുമെന്നും കാസർകോട് മുതൽ തിരുവനന്തപുരം വരെ കർഷക യാത്ര സംഘടിപ്പിക്കുമെന്നും അദ്ദേഹം പറഞ്ഞു.

‘‘ഏറ്റവും കൂടുതൽ ദുരിതമനുഭവിക്കുന്നവരാണ് കർഷകർ. കാർഷിക വസ്‌തുക്കൾക്ക് വിലയിടിവാണ്. അതിന്റെ വിപണനസാധ്യതകൾ അസ്‌തമിച്ചു കഴിഞ്ഞു. ഏറ്റവും വേദനിക്കുന്ന വിഭാഗമായി കർഷകർ മാറി. കാർഷിക പ്രശ്‌നങ്ങളിൽ കർഷക സംഘടനകളെ ഒരുമിച്ച് നിർത്തി സമ്മർദശക്തിയായി മാറും. രാഷ്ട്രീയ സമ്മർദങ്ങൾക്ക് കീഴടങ്ങില്ല‘‘- ബിഷപ് പറഞ്ഞു.