മലപ്പുറം: നവകേരള സദസില് സ്കൂള് കുട്ടികളെ പങ്കെടുപ്പിക്കണമെന്ന നിര്ദേശം വിവാദമായതോടെ വിശദീകരണവുമായി തിരൂരങ്ങാടി ഡിഇഒ രംഗത്ത്.
നവകേരള സദസില് നിര്ബന്ധമായും കുട്ടികളെ പങ്കെടുപ്പിക്കണമെന്ന് ആവശ്യപ്പെട്ടിട്ടില്ലെന്ന് ഡിഇഒ പറഞ്ഞു. നവകേരള സദസ് കുട്ടികള്ക്ക് ഒരു അനുഭവമായിരിക്കും. പഠനത്തിന്റെ ഭാഗമായി അവരെ പങ്കെടുപ്പിക്കണമെന്ന നിര്ദേശം മുന്നോട്ടുവെക്കുക മാത്രമാണ് ചെയ്തത്.
സാമൂഹ്യശാസ്ത്ര ക്ലബ്ബുകളുടെ നേതൃത്വത്തില് കുട്ടികളെ കൊണ്ടുപോകാം. അതിന് സ്കൂള് ബസ് ഉപയോഗിക്കാമെന്നാണ് നിര്ദേശിച്ചതെന്നും ഡിഇഒ പറയുന്നത്.
കഴിഞ്ഞ ദിവസം തിരൂരങ്ങാടി ഡിഇഒ വിളിച്ച് ചേര്ത്ത യോഗത്തിലാണ് കുട്ടികളെ നവകേരള സദസിനെത്തിക്കാന് പ്രധാന അധ്യാപകര്ക്ക് നിര്ദേശം നല്കിയത്. ഓരോ സ്കൂളില്നിന്നും കുറഞ്ഞത് 200 കുട്ടികളെയെങ്കിലും എത്തിക്കണമെന്നാണ് ആവശ്യപ്പെട്ടത്.
താനൂര് മണ്ഡലത്തില്നിന്ന് 200 ഉം തിരൂരങ്ങാടി, വേങ്ങര മണ്ഡലങ്ങളില്നിന്ന് കുറഞ്ഞത് 100 കുട്ടികളെ വീതമെങ്കിലും എത്തിക്കണമെന്നാണ് ഡിഇഒ നിര്ദേശിച്ചത്.
അച്ചടക്കമുള്ള കുട്ടികളെ മാത്രം കൊണ്ടുപോയാല് മതിയെന്നും നിര്ദേശമുണ്ട്. പ്രധാന അധ്യാപകര് യോഗത്തില് അതൃപ്തി അറിയിച്ചപ്പോള് മുകളില്നിന്നുള്ള നിര്ദേശമാണ് എന്നാണ് ഡിഇഒ മറുപടി നല്കിയതെന്നാണ് റിപ്പോര്ട്ട്.