അകത്തേത്തറ റെയിൽവേ മേൽപാലം പണി ഒച്ചിനേപ്പോലെ ഇഴയുമ്പോൾ ജനജീവിതവും ദുരിതത്തിലാവുന്നു

പാലക്കാട്: അകത്തേത്തറ റെയിൽവേ മേൽപാലം പണി തുടങ്ങിയിട്ട് വർഷങ്ങൾ പിന്നിടുമ്പോൾ അകത്തേത്തറ നിവാസികളുടെ ദുരിതവും ഏറുന്നു. അത്യാവശ്യഘട്ടങ്ങളിൽ പാലക്കാട് നഗരത്തിലേക്ക് പോകണമെങ്കിൽ മലമ്പുഴ മന്തക്കാട് വഴിയോ, റെയിൽവേ കോളനി വഴിയോ ചുറ്റിവളഞ്ഞു് പോകണം. 

പത്തു രൂപ ബസ്സ് ചാർജ്ജ് കൊടുത്ത് പോകേണ്ട ദൂരം അമ്പതോ അറുപതോ രൂപ കൊടുത്ത് ഓട്ടോയിൽ പോകേണ്ട ഗതികേടാണുള്ളതെന്ന് നാട്ടുകാർ പറയുന്നു. ബസ് പലപ്പോഴും ഈ വഴി തിരിഞ്ഞു നോക്കാത്തതും സർവ്വീസ് റോഡ് പണി പൂർത്തിയാകാത്തതും പരിസരവാസികൾക്ക് ദുരിതം വർദ്ധിപ്പിക്കുന്നു.

കഴിഞ്ഞ ദിവസങ്ങളിൽ കേന്ദ്ര മന്ത്രി പാലക്കാട് സന്ദർശിച്ചപ്പോൾ നേതാക്കൾ ഈ വിഷയം ശ്രദ്ധയിൽ പെടുത്തിയിരുന്നു. എത്രയുംവേഗം പണി പൂർത്തിയാക്കാനുള്ള നടപടി സ്വീകരിക്കുമെന്ന് മന്ത്രി പറഞ്ഞിരുന്നത് പ്രാവർത്തീകമായിരുന്നെങ്കിലെന്ന് ആശിക്കുകയാണ് അകത്തേത്തറക്കാരും പരിസര നാടുകളിലെ ജനങ്ങളും.