സുരേഷ് ഗോപി മറിയക്കുട്ടിയെ കണ്ടിട്ട് വരട്ടെ, അദ്ദേഹത്തെ സിനിമയിലൊന്നും കാണാനില്ല, ബിജെപിയില്‍ വലിയ നേതാവല്ലേ, എന്തെങ്കിലുമൊക്കെ ചെയ്യണ്ടേ? എല്ലാ മാധ്യമങ്ങള്‍ക്കും പറ്റാവുന്ന പിശകാണ് ദേശാഭിമാനിക്കും പറ്റിയതെന്ന് ഇപി ജയരാജന്‍

തിരുവനന്തപുരം: സാമ്പത്തിക പ്രതിസന്ധി ഇല്ലാത്ത ഏതെങ്കിലും കാലഘട്ടം കേരളത്തിലുണ്ടായിട്ടുണ്ടോയെന്ന് എല്‍ഡിഎഫ് കണ്‍വീനര്‍ ഇ പി ജയരാജന്‍. സാമ്പത്തിക പ്രതിസന്ധി കാരണം പരിപാടികള്‍ ഒഴിവാക്കാന്‍ കഴിയുമോ?. വികസന നേട്ടങ്ങള്‍ നാടിന് ആവശ്യമാണ്. കേരളീയത്തില്‍ നിന്ന് വിട്ട് നിന്നതോടെ പ്രതിപക്ഷം ഒറ്റപ്പെട്ടു. 

പ്രതിപക്ഷത്തിനൊപ്പം സഞ്ചരിക്കുന്ന ദുഃഖം ബിജെപിക്കുമുണ്ട്. പ്രതിസന്ധികള്‍ക്കിടയിലൂടെ സഞ്ചരിച്ച് പ്രതിസന്ധിയെ തരണം ചെയ്ത് ജനങ്ങളെ കാത്തുസൂക്ഷിക്കുകയാണ് ഭരണം. ആ ഭരണമാണ് കേരളത്തില്‍ ഉള്ളത്. ക്ഷേമ പെന്‍ഷന്‍ നല്‍കുന്നു, നെല്‍ കര്‍ഷകര്‍ക്ക് പണം അനുവദിക്കുന്നു, കേരളത്തിലെ ഭരണത്തെ അഭിനന്ദിക്കൂവെന്ന് അദ്ദേഹം പ്രതികരിച്ചു.

എല്ലാ മാധ്യമങ്ങള്‍ക്കും പറ്റാവുന്ന പിശകാണ് ദേശാഭിമാനിക്കും പറ്റിയത്.അത് ദേശാഭിമാനി തിരുത്തി. ജീവിച്ചിരിക്കുന്ന ആളിന്റെ പടം മരിച്ച ആളിന്റെതായി നല്‍കിയിട്ടില്ലേ,മനുഷ്യര്‍ക്ക് പിശക് പറ്റും.

ആ പാവപ്പെട്ട സ്ത്രീയെ നിര്‍ബന്ധിച്ചു കൊണ്ടു പോയി കേസു കൊടുപ്പിച്ചു. ആദ്യമായി തെറ്റു പറ്റിയ മാധ്യമമാണോ ദേശാഭിമാനി. തെറ്റ് എല്ലാ മനുഷ്യര്‍ക്കും പറ്റും.എന്നെക്കുറിച്ച് തന്നെ എന്തെല്ലാം എഴുതിയിട്ടുണ്ട് അതൊക്കെ തിരുത്തിയോ?.പാര്‍ട്ടിയെ ബാധിച്ച കളങ്കം തന്നെയാണ്, ദേശാഭിമാനി എഴുതിയാല്‍ ബാധിക്കുന്നത് പാര്‍ട്ടിയെ തന്നെയാണെന്ന് അദ്ദേഹം പറഞ്ഞു.

നേരത്തെയുള്ള തെരഞ്ഞെടുപ്പുകളിലും ഈ വ്യാജ ഐഡി കാര്‍ഡുകള്‍ കോണ്‍ഗ്രസ് ഉപയോഗിച്ചിട്ടുണ്ടാകണം. സ്വന്തമായി വ്യാജ ഐഡി കാര്‍ഡുകള്‍ ഉണ്ടാക്കാനുള്ള സംവിധാനം കോണ്‍ഗ്രസിനുണ്ട്. തെരഞ്ഞെടുപ്പ് കമ്മീഷനും കേന്ദ്രസര്‍ക്കാരും ഇത് ഗൗരവത്തില്‍ എടുക്കണമെന്നും അദ്ദേഹം കൂട്ടിച്ചേര്‍ത്തു.

സുരേഷ് ഗോപി മറിയക്കുട്ടിയെ കണ്ടിട്ട് വരട്ടെ, അദ്ദേഹത്തെ സിനിമയിലൊന്നും കാണാനില്ല. ബിജെപിയില്‍ വലിയ നേതാവല്ലേയെന്നും എന്തെങ്കിലും ചെയ്യണ്ടേയെന്നും ഇ.പി.ജയരാജന്‍ പരിഹസിച്ചു.