ആറാമത് ക്യാപ്റ്റൻ രാജു പുരസ്കാരം മണിയൻപിള്ള രാജുവിന് സമ്മാനിച്ചു

തിരുവനന്തപുരം: പ്രേക്ഷക മനസ്സിൽ എന്നും ജീവിക്കുന്ന കഥാപാത്രങ്ങളെ അവതരിപ്പിക്കാൻ ക്യാപ്റ്റൻ രാജുവിന് കഴിഞ്ഞതായി കേരള സാംസ്കാരിക പ്രവർത്തക ക്ഷേമനിധി ബോർഡ് ചെയർമാനും നടനും സംവിധായകനുമായ മധുപാൽ പറഞ്ഞു.

സിനിമ പ്രേക്ഷക കൂട്ടായ്മയുടെ ആറാമത് ക്യാപ്റ്റൻ രാജു പുരസ്കാരം നടൻ മണിയൻപിള്ള രാജുവിന് ‌നൽകി സംസാരിക്കുകയായിരുന്നു അദ്ദേഹം. 

സിനിമ പ്രേക്ഷക കൂട്ടായ്മ ക്യാപ്റ്റൻ രാജു പുരസ്കാര സമിതി സെക്രട്ടറി സലിം പി. ചാക്കോ അധ്യക്ഷനായിരുന്നു. മധുപാലും പി.ആർ.ഒ അജയ് തുണ്ടത്തിലും ചേർന്ന് മണിയൻപിള്ള രാജുവിന് പ്രശസ്തിപത്രം നൽകി.

നടൻ നിരഞ്ജ് മണിയൻപിള്ള രാജു, സിനിമ പ്രേക്ഷക കൂട്ടായ്മ ജില്ല കൺവീനർ പി. സക്കീർ ശാന്തി, പി.ആർ.ഒ അജയ് തുണ്ടത്തിൽ, ബിജു ആർ. പിള്ള, ജോസഫ് വടശ്ശേരിക്കര എന്നിവർ ചടങ്ങിൽ പ്രസംഗിച്ചു.

മുമ്പ് നടൻ ജനാർദ്ദനൻ (2020), സംവിധായകൻ ബാലചന്ദ്രമേനോൻ (2021), സംവിധായകൻ ജോണി ആന്റണി (2022), നടൻ ലാലു അലക്സ് (2023), നടൻ ജയറാം (2024) എന്നിവർക്ക് പുരസ്കാരം ലഭിച്ചിരുന്നു.

മലയാള ചലച്ചിത്ര രംഗത്ത് 50 വർഷം പൂർത്തിയാക്കിയ മണിയൻപിള്ള രാജുവിനെ ചടങ്ങിൽ അനുമോദിക്കുകയും ചെയ്തു.