തൃശൂര്‍ ജില്ലയില്‍ ദേശിയ എമർജൻസി മെഡിക്കൽ ടെക്‌നീഷ്യൻ (ഇ.എം.ടി) ദിനം ആചരിച്ചു

തൃശൂർ: ജില്ലയിൽ ദേശിയ എമർജൻസി മെഡിക്കൽ ടെക്‌നീഷ്യൻ (ഇ.എം.ടി) ദിനം ആചരിച്ചു. കനിവ് 108 ആംബുലൻസ് സർവീസിൽ ജോലി ചെയ്യുന്ന എമർജൻസി മെഡിക്കൽ ടെക്‌നീഷ്യൻമാരുടെ പ്രവർത്തനങ്ങളെ ആദരിച്ചുകൊണ്ടാണ് ജില്ലയിൽ എമർജൻസി മെഡിക്കൽ ടെക്‌നീഷ്യൻ (ഇ.എം.ടി)  ദിനം ആചരിച്ചത്. 

108 ആംബുലൻസിലെ എമർജൻസി മെഡിക്കൽ ടെക്‌നീഷ്യൻമാർക്കൊപ്പം കേക്ക് മുറിച്ച് ജില്ലാ മെഡിക്കൽ ഓഫീസർ (ആരോഗ്യം) ഡോ. ശ്രീദേവി ആഘോഷങ്ങളിൽ പങ്കാളിയായി. ജില്ലാ സർവൈലൻസ് ഓഫീസർ ഡോ. സതീഷ്, രാജു, 108 ആംബുലൻസ് സർവീസ് ജില്ലാ കോഓർഡിനേറ്റർ ഷഹബാസ്, ഇ.എം.ടിമാരായ അജോ ജോസ്, സുമി എന്നിവർ സന്നിഹിതരായിരുന്നു. 

അടിയന്തിരഘട്ടങ്ങളിൽ രോഗികൾക്ക് വൈദ്യസഹായം എത്തിക്കുന്നതിലും ജീവൻ രക്ഷിക്കുന്നതിലും എമർജൻസി മെഡിക്കൽ ടെക്‌നീഷ്യൻമാർ നടത്തുന്ന പ്രവർത്തനങ്ങളെ ആദരിച്ചു കൊണ്ടാണ് ദേശിയ വ്യാപകമായി ഏപ്രിൽ 2 എമർജൻസി മെഡിക്കൽ ടെക്‌നീഷ്യൻ (ഇ.എം.ടി)  ദിനമായി ഇ.എം.ആർ.ഐ ഗ്രീൻ ഹെൽത്ത് സർവീസസ് ആചരിക്കുന്നത്. നേഴ്സുമാരായ 46 പേരാണ് ജില്ലയിൽ നിലവിൽ 108 ആംബുലൻസ് പദ്ധതിയിൽ എമർജൻസി മെഡിക്കൽ ടെക്‌നീഷ്യൻമാരായി ജോലി ചെയ്യുന്നത്. 

ദേശിയ തലത്തിൽ ഇ.എം.ആർ.ഐ ഗ്രീൻ ഹെൽത്ത് സർവീസസിന് കീഴിൽ വിവിധ പദ്ധതികളിലായി 23,000 പേരും സംസ്ഥാനത്ത്  541 പേരും എമർജൻസി മെഡിക്കൽ ടെക്‌നീഷ്യൻമാരായി ജോലി ചെയ്യുന്നതായി ഇ.എം.ആർ.ഐ ഗ്രീൻ ഹെൽത്ത് സർവീസസ് സംസ്ഥാന ഓപ്പറേഷൻസ് മേധാവി ശരവണൻ അരുണാചലം അറിയിച്ചു.