വയനാട്ടിൽ പോലീസിന് നേരെ വെടിയുതിർത്ത് മാവോയിസ്റ്റ് സംഘം

വയനാട്: വയനാട് കമ്പമലയിൽ പോലീസിന് നേരെ മാവോയിസ്റ്റ് സംഘത്തിൻ്റെ  വെടിവെയ്പ്പ്. മേഖലയിൽ മാവോയിസ്റ്റുകൾക്കായി തണ്ടർബോൾട്ട് തെരച്ചിൽ നടത്തിവരികയായിരുന്നു. പ്രദേശത്ത് പരിശോധന തുടരുന്ന ഘട്ടത്തിലാണ് തണ്ടർബോൾട്ടിന് നേരെ മാവോയിസ്റ്റ് സംഘം വെടിയുതിർത്തത്. 

ഉൾക്കാട്ടിൽ നിന്ന് 9 റൗണ്ട് വെടി ശബ്ദം കേട്ടതായി തോട്ടം തൊഴിലാളികൾ പറയുന്നു. ഇതോടെ പ്രദേശത്ത് പൊലീസിൻ്റെ പരിശോധന തുടരുകയാണ്. കമ്പമല - ആറളം വനമേഖലയിലാണ് സംഭവം. മാനന്തവാടി ഡിവൈഎസ്പി ഉൾപ്പെടെയുള്ള സംഘം സ്ഥലത്തെത്തിയിട്ടുണ്ട്. 

ഇലക്ഷൻ ബഹിഷ്ക്കരിക്കണമെന്നാവശ്യപ്പെട്ട് വയനാട് ജനവാസ മേഖലയിൽ തോക്കു ധാരികളായ മാവോയിസ്റ്റുകൾ എത്തുകയും ആളുകളുമായി സംസാരിക്കുകയും ചെയ്യുന്ന വീഡിയോ പുറത്തുവിട്ടിരുന്നു. മേഖലയിൽ മാവോയിസ്റ്റ് സാന്നിദ്ധ്യം ശക്തമാകുന്നതിൻ്റെ തെളിവാണ് ഇപ്പോൾ സംഭവിച്ച വെടിവെയ്പ്.