മകളുടെ വിവാഹത്തിനായി അവധിക്കെത്തി; വിവാഹത്തലേന്ന് അച്ഛന് ദാരുണാന്ത്യം

മലപ്പുറം: മകളുടെ വിവാഹത്തലേന്ന് പിതാവ് കുഴ‍ഞ്ഞുവീണ് മരിച്ചു. അധ്യാപകനാ‌യ മേലാറ്റൂർ ചെമ്മാണിയോട്ടെ പങ്കത്ത് രാധാകൃഷ്ണൻ (57) ആണ് മരിച്ചത്. മകൾ റീതു കൃഷ്ണയുടെ വിവാഹത്തലേന്ന് പുലർച്ചെ രാധാകൃഷ്ണന് ഹൃദയാഘാതമുണ്ടാകുകയായിരുന്നു. 

രാത്രി ഒരു മണിയോടെ വീട്ടിൽ കുഴഞ്ഞുവീണ രാധാകൃഷ്ണനെ ആശുപത്രിയിലെത്തിച്ചങ്കിലും ജീവൻ രക്ഷിക്കാനായില്ല. മാലദ്വീപിൽ അധ്യാപകനായി ജോലി ചെയ്യുന്ന  രാധാകൃഷ്ണൻ 15 ദിവസം മുൻപാണ് നാട്ടിലെത്തിയത്. അടുത്തമാസം ഏഴിന് തിരിച്ചു പോകാനിരിക്കെയാണ് മരണം സംഭവിച്ചത്. ഭാര്യ റീന. മറ്റൊരു മകൾ: റിയാകൃഷ്ണ.