/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2025/01/14/IsqUWUKfBbKco8VyKARp.jpg)
തിരുവനന്തപുരം: തലസ്ഥാനത്തെ സിനിമാ പ്രേമികള്‍ക്ക് ആവേശമേകി വിഖ്യാത ജര്‍മന്‍ ചലച്ചിത്രകാരന്‍ വിം വെന്‍ഡേഴ്സ് ഫെബ്രുവരി 10ന് തിരുവനന്തപുരത്ത് എത്തും. രാജ്യത്തെ 7 നഗരങ്ങളില്‍ സംഘടിപ്പിക്കുന്ന 'കിംഗ് ഓഫ് ദി റോഡ് -ദി ഇന്ത്യ ടൂര്‍' പരിപാടിയുടെ ഭാഗമായാണ് വെന്‍ഡേഴ്സ് എത്തുന്നത്.
വെന്‍ഡേഴ്സിന്‍റെ 18 സിനിമകളുടെ പാക്കേജ് ഫെബ്രുവരി 10, 11 കൈരളി, ശ്രീ, നിള തിയേറ്ററുകളിലായി പ്രദര്‍ശിപ്പിക്കും. ചലച്ചിത്ര വിദ്യാര്‍ഥികള്‍ക്കും സിനിമാ പ്രവര്‍ത്തകര്‍ക്കുമായി വെന്‍ഡേഴ്സിന്‍റെ മാസ്റ്റര്‍ക്ലാസുകളും ഒരുക്കിയിട്ടുണ്ട്.
1970 കളില്‍ തുടക്കമായ ജര്‍മന്‍ നവസിനിമയുടെ അഗ്രഗാമികളിലൊരാളായ വിം വെന്‍ഡേഴ്സ് സമകാലിക ലോക സിനിമയിലെ മുന്‍നിരക്കാരില്‍ ഒരാളാണ്. വെന്‍ഡേഴ്സിന്‍റെ ക്ലാസിക്ക് സിനിമകളും ഷോര്‍ട്ട് ഫിലിമുകളും ഡോക്യുമെന്‍ററികളും ഫിലിം ഫെസ്റ്റില്‍ പ്രദര്‍ശിപ്പിക്കും. സൗജന്യ പാസുകള്‍ ക്യു ആര്‍ കോഡ് സ്കാന്‍ ചെയ്തും തിരുവനന്തപുരം ജവഹര്‍ നഗറിലെ ഗൊയ്ഥെ സെന്‍ട്രം ഓഫീസില്‍ (ഡി-9) നിന്ന് നേരിട്ടും ലഭിക്കും.
ദി ഗോളീസ് ആങ്സൈറ്റി അറ്റ് ദി പെനാല്‍റ്റി കിക്ക് (1971), ആലീസ് ഇന്‍ ദി സിറ്റീസ് (1973), കിംഗ്സ് ഓഫ് ദി റോഡ് (1975), ദി അമേരിക്കന്‍ ഫ്രണ്ട് (1977), ലൈറ്റ്നിംഗ് ഓവര്‍ വാട്ടര്‍ (1980), റിവേഴ്സ് ആംഗിള്‍ (1982), റൂം 666 (1982), ദി സ്റ്റേറ്റ് ഓഫ് തിംഗ്സ് (1982), പാരീസ്, ടെക്സസ് (1984), ടോക്കിയോ-ഗാ (1985), വിംഗ്സ് ഓഫ് ഡിസയര്‍ (1987), അണ്‍ഡില്‍ ദി എന്‍ഡ് ഓഫ് ദി വേള്‍ഡ് - ഡയറക്ടേഴ്സ് കട്ട് (1994), ദ എന്‍ഡ് ഓഫ് വയലന്‍സ് (1997), ബ്യൂണ വിസ്ത സോഷ്യല്‍ ക്ലബ് (1999), ദ മില്യണ്‍ ഡോളര്‍ ഹോട്ടല്‍ (2000), ഡോണ്ട് കം നോക്കിംഗ് (2005), പിന (3ഡി) (2011), അന്‍സെലം -3ഡി (2023) എന്നീ സിനിമകളാണ് തിരുവനന്തപുരത്ത് പ്രദര്‍ശിപ്പിക്കുക.
പാരീസ്, ടെക്സാസ് (1984), വിംഗ്സ് ഓഫ് ഡിസയര്‍ (1987) തുടങ്ങിയവ വെന്‍ഡേഴ്സിന്‍റെ മാസ്റ്റര്‍പീസുകളാണ്. പിന, ബ്യൂന വിസ്ത സോഷ്യല്‍ ക്ലബ്, ദി സാള്‍ട്ട് ഓഫ് ദി എര്‍ത്ത് എന്നീ ഡോക്യുമെന്‍ററികളും ആഗോള തലത്തില്‍ ഏറെ ശ്രദ്ധേയങ്ങളാണ്. പാം ഡി ഓര്‍, ഗോള്‍ഡന്‍ ലയണ്‍, ബാഫ്താ പുരസ്കാരങ്ങള്‍ നേടിയിട്ടുള്ള വെന്‍ഡേഴ്സിന് നിരവധി തവണ ഓസ്കര്‍ നാമനിര്‍ദേശവും ലഭിച്ചിട്ടുണ്ട്.
ജര്‍മന്‍ ചിത്രകാരനും ശില്‍പ്പിയുമായ അന്‍സെലം കീഫറിനെക്കുറിച്ചുള്ള ത്രിഡി ഡോക്യുമെന്‍ററി ചിത്രമായ അന്‍സെലം, ജാപ്പനീസ് ഭാഷയിലുള്ള പെര്‍ഫെക്ട് ഡേയ്സ് എന്നീ വെന്‍ഡേഴ്സിന്‍റെ ഏറ്റവും പുതിയ ചിത്രങ്ങളുടെ പ്രീമിയര്‍ 2023 ലെ കാന്‍ ഫെസ്റ്റിവലില്‍ ആയിരുന്നു. പെര്‍ഫെക്ട് ഡേയ്സിലൂടെ കോജി യാകുഷോയ്ക്ക് കാന്‍സിലെ മികച്ച നടനുള്ള അവാര്‍ഡ് ലഭിച്ചു. വെന്‍ഡേഴ്സിന്‍റെ അന്താരാഷ്ട്ര തലത്തില്‍ ഏറ്റവും വിജയിച്ച ചിത്രമായി പെര്‍ഫെക്റ്റ് ഡേയ്സ് മാറി. 2024 ല്‍ 'ഇന്‍റര്‍നാഷണല്‍ ഫീച്ചര്‍ ഫിലിം' വിഭാഗത്തില്‍ ഓസ്കാറിനും ഈ ചിത്രം നാമനിര്‍ദ്ദേശം ചെയ്യപ്പെട്ടു.
ഫിലിം ഹെറിറ്റേജ് ഫൗണ്ടേഷന്‍, വിം വെന്‍ഡേഴ്സ് സ്റ്റിഫ്റ്റങ് (വിം വെന്‍ഡേഴ്സ് ഫൗണ്ടേഷന്‍), ഗൊയ്ഥെ ഇന്‍സ്റ്റിറ്റ്യൂട്ട് എന്നിവയുമായി സഹകരിച്ചാണ് പരിപാടി സംഘടിപ്പിക്കുന്നത്. കേരള സംസ്ഥാന ചലച്ചിത്ര വികസന കോര്‍പ്പറേഷനുമായും (കെഎസ്എഫ്ഡിസി) കേരള ചലച്ചിത്ര അക്കാദമിയുമായും സഹകരിച്ചാണ് ഗൊയ്ഥെ ഇന്‍സ്റ്റിറ്റ്യൂട്ട് വെന്‍ഡറുടെ സിനിമകള്‍ പ്രദര്‍ശിപ്പിക്കുന്നത്. ഫിലിം ഹെറിറ്റേജ് ഫൗണ്ടേഷനുമായി സഹകരിച്ച് വിം വെന്‍ഡേഴ്സാണ് ഈ ചിത്രങ്ങള്‍ ക്യൂറേറ്റ് ചെയ്തിരിക്കുന്നത്.
വെന്‍ഡേഴ്സ് റെട്രോസ്പെക്ടീവ് ഇന്ത്യ ടൂര്‍ ഫെബ്രുവരി 5 ന് മുംബൈയിലാണ് ആരംഭിച്ചത്. പൂനെ, കൊല്‍ക്കത്ത, ന്യൂഡല്‍ഹി നഗരങ്ങളും പരിപാടിക്ക് ആതിഥേയത്വം വഹിക്കുന്നുണ്ട്.