നാട്ടകം വില്ലേജ് ഓഫീസിനു സമീപത്തെ കടകളിൽ മോഷണം. പണവും സാധനങ്ങളും മോഷണം പോയി. മോഷണം പുറത്തറിഞ്ഞത് കടയുടെ പൂട്ട് തകർന്നു കിടക്കുന്നത് നാട്ടുകാർ കണ്ടതോടെ

കോട്ടയം: നാട്ടകം വില്ലേജ് ഓഫിസിനു സമീപത്തെ കടകളിലും ജന സേവാ കേന്ദ്രത്തിലും മോഷണം. കടയ്ക്കുള്ളിൽ കയറിയ മോഷ്ടാവ് പണവും സാധനങ്ങളും അടക്കം കവർന്നു. ഞായറാഴ്ച സ്ഥാപനങ്ങൾ അവധിയായതിനാൽ വളരെ വൈകിയാണ് മോഷണം വിവരം പുറത്തറിഞ്ഞത്.

നാട്ടകം വില്ലേജ് ഓഫിസിനു സമീപം പ്രവർത്തിക്കുന്ന പരുത്തുംപാറ സ്വദേശി ജിനുവിന്റെ ഉടമസ്ഥതയിലുള്ള കടയിലാണ് മോഷണം നടന്നത്. ഇവിടെ നിന്നും മൂവായിരത്തോളം രൂപ നഷ്ടമായിട്ടുണ്ട്.

ഇതിനു സമീപത്തു തന്നെ പ്രവർത്തിക്കുന്ന എ.ആർ ഹോം കെയറിലും മോഷണം നടന്നു. ഇവിടെ നിന്നും പണം നഷ്ടമായിട്ടില്ല.   കടകളുടെ പൂട്ട് പൊളിച്ചാണ് മോഷ്ടാവ് ഉള്ളിൽ കയറിയിരിക്കുന്നത്.

ഞായറാഴ്ച സ്ഥാപനങ്ങൾ അവധിയായതിനാൽ ആളുകളുടെ ശ്രദ്ധയിൽപ്പെടാൻ വൈകി. സ്ഥാപനത്തിന്റെ പൂട്ട് പൊളിഞ്ഞ് കിടക്കുന്നത് കണ്ട് വഴിയാത്രക്കാരാണ് വിവരം അറിയിച്ചത്.
സംഭവം അറിഞ്ഞ് ചിങ്ങവനം പോലീസ്   സ്ഥലത്തെത്തി അന്വേഷണം ആരംഭിച്ചു.