നൈപുണ്യ പരിശീലനം മഹത്തായ കർമം - പിടിഎ റഹീം എംഎൽഎ

കോഴിക്കോട്: വിവിധ നൈപുണികളിൽ കൃത്യമായ പരിശീലനവും വൈദഗ്ധ്യവും നേടുന്നത് മഹത്തായ കർമമാണെന്നും നിപുണനായ മനുഷ്യരുടെ സാന്നിധ്യമാണ് സമൂഹത്തെ ഉന്നമനത്തിലേക്ക് നയിക്കുകയെന്നും പിടിഎ റഹീം എംഎൽഎ. മർകസ് ഐടിഐയിൽ നിന്ന് 2024-25 അധ്യയന വർഷം പഠനം പൂർത്തിയാക്കി വിവിധ കമ്പനികളിലും സ്ഥാപനങ്ങളിലും ജോലി നേടിയ വിദ്യാർഥികൾക്കുള്ള കോൺവൊക്കേഷൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

29-ാമത് എൻ.സി.വി.ടി ബാച്ചിൽ നിന്നും മെക്കാനിക്ക് ഡീസൽ, ഇലക്ട്രോണിക് മെക്കാനിക്ക്, വയർമാൻ, സർവെയർ തുടങ്ങിയ ട്രേഡുകളിൽ നിന്നായി 78 വിദ്യാർഥികളാണ് ഇത്തവണ പ്ലേസ്‌മെന്റോടെ പഠനം പൂർത്തീകരിച്ചത്. കുന്ദമംഗലം ഗ്രാമപഞ്ചായത്ത് വൈസ് പ്രസിഡന്റ് വി അനിൽകുമാർ സർട്ടിഫിക്കറ്റുകൾ വിതരണം ചെയ്തു.

പഠനം പൂർത്തിയാക്കിയ വിദ്യാർഥികൾക്കെല്ലാം തൊഴിൽ നൽകുന്ന സംസ്ഥാനത്തെ തന്നെ മുൻനിര ഐടിഐകളിലൊന്നാണ് മർകസിലേത്. നിലവിൽ 29 എൻ സി വി ടി  ബാച്ചുകളിലായി 3169 വിദ്യാർഥികളാണ് ഇവിടെനിന്നും പഠനം പൂർത്തിയാക്കി വിവിധ മേഖലകളിൽ സേവനമനുഷ്ഠിക്കുന്നത്.