മുണ്ടക്കയം പുഞ്ചവയലില്‍ ഭാര്യയെയും ഭാര്യാമാതാവിനെയും വെട്ടികൊലപ്പെടുത്താന്‍ ശ്രമിച്ച പ്രതിയെ മരിച്ച നിലയില്‍ കണ്ടെത്തി. കൊലപാതക ശ്രമിത്തിനിടെ ബഹളം കേട്ടെത്തിയ നാട്ടുകാരെ കണ്ട പ്രതി ഓടി രക്ഷപെട്ടിരുന്നു. പ്രതിക്കായുള്ള പോലീസിന്റെ അന്വേഷണത്തിനിടെയാണു മൃതദേഹം കണ്ടെത്തിയത്

കോട്ടയം: മുണ്ടക്കയം പുഞ്ചവയലില്‍ ഭാര്യയെയും ഭാര്യാമാതാവിനെയും വെട്ടി കൊലപ്പെടുത്താന്‍ ശ്രമിച്ച പ്രതിയെ മരിച്ച നിലയില്‍ കണ്ടെത്തി. മുണ്ടക്കയം കരിനിലം സ്വദേശി പ്രദീപിനെയാണു മരിച്ചനിലയില്‍ കണ്ടെത്തിയത്. പുഞ്ചവയല്‍ ചേരുതോട്ടില്‍ സൗമ്യയെയും അമ്മ  ബീനയെയുമാണ് പ്രദീപ് വെട്ടി പരുക്കേല്‍പ്പിച്ചത്.

കുടുംബപ്രശ്നങ്ങളെ തുടര്‍ന്നാണ് അക്രമമെന്നു പോലീസ് പറയുന്നു. പ്രദീപ് ഭാര്യ സൗമ്യയുമായി ഏറെ നാളായി അകന്നു കഴിയുകയായിരുന്നു. ഇതിനിടെയാണു സൗമ്യയും അമ്മയും വാടകയ്ക്കു താമസിക്കുന്ന വീട്ടിലെത്തി വെട്ടി പരുക്കേല്‍പ്പിച്ചത്. ബഹളം കേട്ടെത്തിയ നാട്ടുകാരാണു വിവരം പോലീസിനെ അറിയിച്ചത്.

അപ്പോഴേയ്ക്കും പ്രതി ഓടി രക്ഷപെട്ടു. തുടര്‍ന്നു നാട്ടുകാരുടെ നേതൃത്വത്തില്‍ ഇരുവരെയും ആശുപത്രിയില്‍ എത്തിക്കുകയായിരുന്നു. സംഭവത്തില്‍ മുണ്ടക്കയം പോലീസ് അന്വേഷണം ആരംഭിച്ചതിനിടെയാണ് പ്രദീപിനെ പുഞ്ചവയല്‍ മൂന്നോലി ഭാഗത്ത് തൂങ്ങി മരിച്ച നിലയില്‍ കണ്ടെത്തിയത്.