തൊടുപുഴയിൽ നിന്നും രാമേശ്വരത്തേക്കും വേളാങ്കണ്ണിക്കും കെ.എസ്.ആർ.ടി.സി ബസ് സർവ്വീസ് ആരംഭിക്കണമെന്ന ആവശ്യം ശക്തം

തൊടുപുഴ: തൊടുപുഴയിൽ നിന്നും രാമേശ്വരത്തേക്കും വേളാങ്കണ്ണിക്കും കെ.എസ്.ആർ.ടി.സി ബസ് സർവ്വീസ് ആരംഭിക്കണമെന്ന ആവശ്യം ശക്തമായി. തൊടുപുഴയിൽ നിന്നും കട്ടപ്പന, കുമളി വഴി സർവ്വീസുകൾ ആരംഭിച്ചാൽ അത് യാത്രക്കാർക്കും കെ.എസ്.ആർ.ടി.സിക്കും ഗുണകരമാകുമെന്ന് കാണിച്ച് ചക്കുപള്ളം നിർമ്മൽ ബയോജെൻ ടെക്നോളജി മാനേജിങ്ങ് ഡയറക്ടർ ഡോ. വി.ആർ രാജേന്ദ്രൻ ഗതാഗത മന്ത്രി കെ.ബി ഗണേഷ് കുമാറിന് നിവേദനം നൽകി.

ഈ സ്ഥലങ്ങളെ കൂട്ടിയിണക്കി ബസ് സർവ്വീസ് ആരംഭിക്കുന്നത് പ്രയോജനകരമാണ്. അതോടൊപ്പം അത് ടൂറിസത്തിൻ്റെയും വ്യാപാരത്തിൻ്റെയും വളർച്ചയ്ക്കും സഹായകരമാകുമെന്ന് നിവേദനത്തിൽ ചൂണ്ടികാട്ടി. ലക്ഷകണക്കിന് തമിഴ്നാട്ടുകാർ കേരളത്തിലും, കേരളീയർ തമിഴ്നാട്ടിലും താമസിക്കുന്നുണ്ട്.

ഇവരും ഇവരുടെ ബന്ധുമിത്രാദികളും സഞ്ചാരത്തിനായി കൂടുതലായി ആശ്രയികുന്നത് ബസ് സർവ്വീസിനെയാണ്. തൊടുപുഴയുടെ സമീപ ജില്ലകളായ എറണാകുളം, കോട്ടയം പ്രദേശങ്ങളിലുള്ളവർക്കും സർവ്വീസ് ഉപകരിക്കുമെന്നും ഡോ. വി.ആർ രാജേന്ദ്രൻ ചൂണ്ടികാട്ടി.