തൃപ്പൂണിത്തുറയിൽ ആവേശം വിതറി യെല്ലോ ക്ലൗഡ് ECL 2.0:മലപ്പുറം അൽമിയ സോളാർ വാരിയേഴ്‌സിന് കിരീടം

കോട്ടയം: എന്റർപ്രണർ ക്രിക്കറ്റ് ലീഗ് രണ്ടാം സീസണിൽ മലപ്പുറം അൽമിയ സോളാർ വാരിയേഴ്സ് വിജയകിരീടം ചൂടി. അൽനിഷാൻ ഷാഹുലിന്റെ ഉടമസ്ഥതയിലുള്ള അൽമിയ സോളാർ വാരിയേഴ്സും, അരുൺ എസ്. ചന്ദ്രന്റെ ഉടമസ്ഥതയിലുള്ള ഐഡ കോട്ടയം ബാറ്റ്ലിയൺസും തമ്മിലുള്ള പോരാട്ടം ടൂർണമെന്റിലെ ഏറ്റവും ശ്രദ്ധേയമായ ഒന്നായിരുന്നു.

കേരളത്തിലെ കരുത്തരായ സംരംഭകർ അണിനിരന്ന ഈ പോരാട്ടത്തിൽ ബിസിനസ് തിരക്കുകൾ മാറ്റിവെച്ച് ഉടമകൾ ഒത്തൊരുമയോടെയും കായിക വീര്യത്തോടെയും മാറ്റുരച്ചു. ഫെബ്രുവരി ആദ്യവാരത്തിൽ തൃപ്പൂണിത്തുറയിൽ ആരംഭിച്ച ഈ കായിക മാമാങ്കം സംരംഭകർക്കിടയിലെ ഐക്യവും സ്പോർട്സ്മാൻ സ്പിരിറ്റും ഉയർത്തിപ്പിടിക്കുന്നതായിരുന്നു.

സമാപന ചടങ്ങിൽ മലയാളത്തിന്റെ പ്രിയ താരം സിജു വിൽസൺ മുഖ്യാതിഥിയായി പങ്കെടുത്തു. വിജയികൾക്ക് ആകർഷകമായ ട്രോഫികളും ക്യാഷ് പ്രൈസുകളും സമ്മാനിച്ചു. യല്ലോ ക്ലൗഡ് ഉടമ ശിവപ്രസാദ് എം, പ്രശസ്ത താരം ശ്രീറാം രാമചന്ദ്രൻ, അൻസാരി, ആര്യ ലക്ഷ്മി, ജിക്സൺ ഫ്രാൻസിസ് എന്നിവർ ചടങ്ങിൽ സംബന്ധിക്കുകയും വിജയികൾക്ക് ആശംസകൾ നേർന്ന് പുരസ്കാരങ്ങൾ വിതരണം ചെയ്യുകയും ചെയ്തു.

അന്താരാഷ്ട്ര താരങ്ങൾ പോലും ഒരു കാലത്ത് പരിമിത ഓവർ ക്രിക്കറ്റ് കളിക്കാനായി ഒഴുകിയെത്തിയിരുന്ന തൃപ്പൂണിത്തുറയുടെ മണ്ണിൽ, ചരിത്രപ്രസിദ്ധമായ അതേ ആവേശത്തോടെ എന്റർപ്രണർ ക്രിക്കറ്റ് ലീഗ് രണ്ടാം സീസണിന് സമാപനമായി.