മധ്യപ്രദേശില്‍ ഗ്രാമീണർ നടത്തിയ പ്രതിഷേധ പ്രകടനത്തിനോടനുഭാവം പ്രകടിപ്പിച്ച് എംഎല്‍എ നടുറോഡിൽ പ്രതിഷേധ ശീർഷാസനം നടത്തി !

ഷിയോപ്പൂര്‍: വ്യവസായശാലയ്ക്കായി സർക്കാർ ഏറ്റെടുക്കുന്ന ഭൂമിക്ക് അടിസ്ഥാനവിലയുടെ നാലിരട്ടി നഷ്ടപരിഹാരം നല്കണമെന്ന ആവശ്യവുമായി ഗ്രാമീണർ നടത്തിയ പ്രതിഷേധപ്രകടനത്തിനൊടുവിൽ സ്ഥലം എംഎല്‍എ തൻ്റെ ഷർട്ടൂരിക്കളഞ്ഞ് നടുറോഡിൽ ശീർഷാസനം നടത്തിയത് കൗതുക കാഴ്ചയായി.

മദ്ധ്യപ്രദേശിലെ ഷിയോപ്പൂർ (Sheopur) ജില്ലാ കലക്‌ടറേറ്റിനു മുന്നിലാണ് ഇന്നലെ ഈ സംഭവം അരങ്ങേറിയത്. കർഷകരുടെ പ്രതിഷേധത്തിന് നേതൃത്വം നൽകിയ ഷിയാപ്പൂർ കോൺഗ്രസ്സ് എംഎല്‍എ ബാബുലാൽ ജൻഡൽ, കളക്ടർ നേരിട്ടുവന്ന് തങ്ങളുടെ പരാതി സ്വീകരിക്കണമെന്ന് ആവശ്യപ്പെട്ടെങ്കിലും പരാതി സ്വീകരിക്കാൻ എസ്‌ഡിഎം എത്തിയതോടെയാണ് പ്രശ്നങ്ങൾ തുടങ്ങിയത്.

കളക്ടർ എത്താത്തതിൽ പ്രതിഷേധിച്ച് എല്ലാവരും തങ്ങളുടെ മേൽവസ്ത്രം ഊരിയെറിഞ്ഞശേഷം റോഡിൽ കുത്തിയിരുന്നു പ്രതിഷേധിച്ചു. ഒരു മണിക്കൂർ കഴിഞ്ഞിട്ടും കളക്ടർ വരാതിരുന്നപ്പോഴാണ് എംഎല്‍എ ശീർഷാസനം തുടങ്ങിയത്.

ഒടുവിൽ കളക്ടറെത്തിയെങ്കിലും പ്രതിഷേധം ശക്തമായതിനാൽ പരാതി വാങ്ങാതെ മടങ്ങുകയായിരുന്നു. സെപ്റ്റംബർ 8 മുതൽ വ്യാപക പ്രക്ഷോഭം നടത്തുമെന്ന് എംഎല്‍എ പ്രഖ്യാപിച്ചു.