കോവിഡ് ഫണ്ട് ദുരുപയോഗം ചെയ്ത കേസ്: കര്‍ണാടക മുന്‍മുഖ്യമന്ത്രി യെദ്യൂരപ്പ പ്രോസിക്യൂഷന്‍ നേരിടേണ്ടിവരും

ബംഗളൂരു:  കോവിഡ് ഫണ്ട് ദുരുപയോഗം ചെയ്ത കേസില്‍ കര്‍ണാടക മുന്‍ മുഖ്യമന്ത്രി ബി എസ് യെദ്യൂരപ്പ പ്രോസിക്യൂഷന്‍ നേരിടേണ്ടിവരുമെന്ന് റിപ്പോര്‍ട്ട്. അഴിമതി അന്വേഷിക്കുന്ന റിട്ടയേര്‍ഡ് ഹൈക്കോടതി ജഡ്ജി മൈക്കല്‍ ഡികുന്‍ഹയുടെ നേതൃത്വത്തിലുള്ള അന്വേഷണ കമ്മീഷന്‍ റിപ്പോര്‍ട്ട് കര്‍ണാടക സര്‍ക്കാരിന് സമര്‍പ്പിച്ചു.

അഴിമതി നിരോധന നിയമത്തിലെ സെക്ഷന്‍ 7 പ്രകാരം അന്നത്തെ മുഖ്യമന്ത്രി ബി എസ് യെദ്യൂരപ്പ, ആരോഗ്യ കുടുംബക്ഷേമ മന്ത്രി ബി ശ്രീരാമുലു എന്നിവരെ പ്രോസിക്യൂട്ട് ചെയ്യാന്‍ റിപ്പോര്‍ട്ടില്‍ ശുപാര്‍ശ ചെയ്തിട്ടുണ്ട്.

കോവിഡ്-19 പാന്‍ഡെമിക് സമയത്ത് ചൈനീസ് കമ്പനികളില്‍ നിന്ന് മൂന്ന് ലക്ഷം പിപിഇ കിറ്റുകള്‍ വാങ്ങിയതിലെ ക്രമക്കേടുകളെക്കുറിച്ചുള്ള ആരോപണങ്ങളെ തുടര്‍ന്നാണ് അന്വേഷണം. അന്വേഷണ കമ്മീഷന്‍ റിപ്പോര്‍ട്ട് ജസ്റ്റിസ് ഡികുന്‍ഹ ഓഗസ്റ്റ് 31 ന് കര്‍ണാടക സര്‍ക്കാരിന് സമര്‍പ്പിച്ചിരുന്നു.

റിപ്പോര്‍ട്ട് അനുസരിച്ച്, യെദ്യൂരപ്പയുടെ നേതൃത്വത്തിലുള്ള ബിജെപി സര്‍ക്കാര്‍ 2020 മാര്‍ച്ച്, ഏപ്രില്‍ മാസങ്ങളില്‍ പിപിഇ കിറ്റുകള്‍, മരുന്നുകള്‍, മെഡിക്കല്‍ ഉപകരണങ്ങള്‍ എന്നിവയുടെ വാങ്ങലുകള്‍ക്ക് അംഗീകാരം നല്‍കി.

ഇവ കൂടുതലും ചൈനീസ് വിതരണക്കാരായ ഡിഎച്ച്ബി ഗ്ലോബല്‍, ബിഗ് ഫാര്‍മസ്യൂട്ടിക്കല്‍സ് എന്നിവയില്‍ നിന്ന് പ്രാദേശിക കമ്പനികള്‍ വാഗ്ദാനം ചെയ്യുന്നതിനേക്കാള്‍ വളരെ ഉയര്‍ന്ന വിലയില്‍ വാങ്ങിയതാണ്.

പ്ലാസ്റ്റി സര്‍ജ് ഇന്‍ഡസ്ട്രീസ് പ്രൈവറ്റ് ലിമിറ്റഡ് പോലുള്ള കമ്പനികള്‍ പിപിഇ കിറ്റുകള്‍ വളരെ കുറഞ്ഞ നിരക്കില്‍ ആദ്യം ഒരു കിറ്റിന് 330.40 രൂപയ്ക്ക് വിറ്റിരുന്നു. പിന്നീട് ഇത് 725 രൂപയായി ഉയര്‍ന്നു. ഇതുമായി താരതമ്യപ്പെടുത്തുമ്പോള്‍, ഡിഎച്ച്ബി ഗ്ലോബല്‍ ഒരു കിറ്റിന് ഏകദേശം 2,117.53 രൂപയാണ് ഈടാക്കിയത്.