'സംസ്ഥാന മുഖ്യമന്ത്രിമാരുടെ പങ്കിനെ നരേന്ദ്ര മോദി വിലമതിക്കുന്നില്ല; മോദി സംസ്ഥാനങ്ങളെ മുനിസിപ്പാലിറ്റികളെപ്പോലെയാണ് പരിഗണിക്കുന്നത്, സംസ്ഥാനങ്ങളോ മുഖ്യമന്ത്രിമാരോ ഉള്ളത് അദ്ദേഹത്തിന് ഇഷ്ടമല്ല': ഫണ്ട് വിനിയോഗ വിഷയങ്ങളിൽ കേന്ദ്ര സർക്കാരിനെതിരെ പ്രതിഷേധിക്കാൻ എല്ലാ സംസ്ഥാനങ്ങളും നിർബന്ധിതരാണെന്ന് എം കെ സ്റ്റാലിൻ

ചെന്നൈ: സംസ്ഥാന മുഖ്യമന്ത്രിമാരുടെ പങ്കിനെ പ്രധാനമന്ത്രി നരേന്ദ്ര മോദി വിലമതിക്കുന്നില്ലെന്ന് തമിഴ്നാട് മുഖ്യമന്ത്രി എം കെ സ്റ്റാലിൻ. കൂടാതെ പ്രധാനമന്ത്രി മോദി സംസ്ഥാനങ്ങളെ മുനിസിപ്പാലിറ്റികളെപ്പോലെയാണ് പരിഗണിക്കുന്നതെന്നും അദ്ദേഹം പറഞ്ഞു.

തൻ്റെ വിദേശയാത്ര കാരണം കേരള മുഖ്യമന്ത്രി പിണറായി വിജയൻ കേന്ദ്ര സർക്കാരിനെതിരെ സംഘടിപ്പിച്ച പ്രതിഷേധത്തിൽ പങ്കെടുക്കാൻ കഴിഞ്ഞില്ലെന്നും അദ്ദേഹം കൂട്ടിച്ചേർത്തു.  

എന്നാൽ, സംസ്ഥാന മന്ത്രി പി ത്യാഗ രാജനെയും ഡിഎംകെ എംപിമാരെയും പ്രതിഷേധത്തിൽ പങ്കെടുക്കാൻ അയച്ചുകൊണ്ട് അദ്ദേഹം പിന്തുണ അറിയിച്ചു. ഫണ്ട് വിനിയോഗ വിഷയങ്ങളിൽ കേന്ദ്ര സർക്കാരിനെതിരെ പ്രതിഷേധിക്കാൻ എല്ലാ സംസ്ഥാനങ്ങളും നിർബന്ധിതരാണെന്ന് തമിഴ്നാട് മുഖ്യമന്ത്രി പറഞ്ഞു.

“ഇതിന് ജനങ്ങൾക്ക് മുന്നിൽ ബിജെപി സർക്കാർ ഉത്തരം പറയേണ്ടിവരും. നേരത്തെ, പ്രധാനമന്ത്രിമാർ സംസ്ഥാനങ്ങളെയും അവിടുത്തെ ജനങ്ങളെയും ബഹുമാനിച്ചിരുന്നു, എന്നാൽ പ്രധാനമന്ത്രി മോദി സംസ്ഥാനങ്ങളെ മുനിസിപ്പാലിറ്റികളെപ്പോലെയാണ് പരിഗണിക്കുന്നത്.

സംസ്ഥാനങ്ങളോ മുഖ്യമന്ത്രിമാരോ ഉള്ളത് അദ്ദേഹത്തിന് ഇഷ്ടമല്ല", എം കെ സ്റ്റാലിൻ പറഞ്ഞു. പ്രധാനമന്ത്രിയായ ശേഷം നരേന്ദ്ര മോദി സംസ്ഥാനങ്ങളുടെ അവകാശങ്ങൾ വെട്ടിച്ചുരുക്കി, ഫണ്ട്, വിദ്യാഭ്യാസം, നിയമം എന്നിവയ്ക്ക് മേലുള്ള അധികാരം എടുത്തുകളഞ്ഞുവെന്ന് എംകെ സ്റ്റാലിൻ അവകാശപ്പെട്ടു.

"ഇത് ഒരു വ്യക്തിക്ക് ഓക്സിജൻ നഷ്ടപ്പെടുന്നതിന് തുല്യമാണ്", ഭാവിയിൽ തങ്ങൾക്കും ഇത് സംഭവിക്കുമെന്ന് സംസ്ഥാന ബിജെപി അധ്യക്ഷന് മുന്നറിയിപ്പ് നൽകികൊണ്ട് എം കെ സ്റ്റാലിൻ പറഞ്ഞു. ബിജെപി സർക്കാരിൻ്റെ നടപടികളെ തമിഴ്നാട് സർക്കാർ ശക്തമായി എതിർക്കുമെന്നും അദ്ദേഹം പറഞ്ഞു. “ജിഎസ്ടി നിലവിൽ വന്നതിന് ശേഷം സംസ്ഥാനങ്ങൾ നിരവധി സാമ്പത്തിക പ്രതിസന്ധികൾ നേരിടുകയാണ്.

എന്നാൽ കേന്ദ്രസർക്കാർ, പ്രശ്നം പരിഹരിക്കുന്നതിനുപകരം, പൊതുജനക്ഷേമ പദ്ധതികൾക്കായി ഉപയോഗിക്കേണ്ട വായ്പകൾ വാങ്ങുന്നതിൽ നിന്ന് സംസ്ഥാനങ്ങൾക്ക് തടസ്സം സൃഷ്ടിക്കുകയാണ്.

ഭരണഘടനയനുസരിച്ച്, സംസ്ഥാന സർക്കാർ മാത്രമാണ് ജനങ്ങളുടെ ക്ഷേമത്തിനായി നേരിട്ട് പ്രവർത്തിക്കുന്നത് എന്നതിനാൽ വായ്പ എടുക്കുന്നതിനെക്കുറിച്ച് തീരുമാനിക്കുന്നത് സംസ്ഥാനത്തിൻ്റെ അവകാശമാണ്. എന്നാൽ ഇത് തടയാനാണ് ബിജെപി ശ്രമിക്കുന്നത്" മുഖ്യമന്ത്രി എംകെ സ്റ്റാലിൻ പറഞ്ഞു.