ചെന്നൈ-ട്രിച്ചി ഹൈവേയില്‍ അമിതവേഗതയില്‍ വന്ന കാര്‍ ഇടിച്ച് രണ്ട് വനിതാ പോലീസുകാര്‍ മരിച്ചു

ചെന്നൈ: ചെന്നൈ-ട്രിച്ചി ഹൈവേയില്‍ അമിതവേഗതയില്‍ വന്ന കാര്‍ മോട്ടോര്‍ ബൈക്കില്‍ ഇടിച്ച് വനിതാ സബ് ഇന്‍സ്‌പെക്ടറും ഒരു വനിതാ ഹെഡ് കോണ്‍സ്റ്റബിളും മരിച്ചു.  തിങ്കളാഴ്ച പുലര്‍ച്ചെയാണ് അപകടം നടന്നത്.

മാധവരം പോലീസ് സ്റ്റേഷനിലെ സബ് ഇന്‍സ്പെക്ടര്‍ ജയശ്രീയും ഹെഡ് കോണ്‍സ്റ്റബിള്‍ നിത്യയുമാണ് മരിച്ചത്. ഇരുവരും സംഭവം നടക്കുമ്പോള്‍ ഒരു പ്രതിയെ പിടികൂടാന്‍ പോവുകയായിരുന്നു.

മധുരാന്തകത്ത് എത്തിയപ്പോള്‍ ഇവരെ മറികടക്കാന്‍ ശ്രമിച്ച കാര്‍ പിന്നില്‍ നിന്ന് ഇടിക്കുകയായിരുന്നു. ഇരുവരും ബൈക്കില്‍ നിന്ന് തെറിച്ചുവീണു.

ജയശ്രീ സംഭവസ്ഥലത്തു തന്നെ മരിച്ചു. നിത്യയെ ഗുരുതരമായി പരിക്കേറ്റ് ചെങ്കല്‍പേട്ട് സര്‍ക്കാര്‍ ആശുപത്രിയിലും പ്രവേശിപ്പിച്ചു. ഗുരുതരമായി പരിക്കേറ്റ നിത്യ താമസിയാതെ മരണത്തിന് കീഴടങ്ങി.

തിരുവണ്ണാമല ജില്ലയില്‍ നിന്നുള്ള മദന്‍ എന്ന ഡ്രൈവറെ മേല്‍മരുവത്തൂര്‍ പോലീസ് അറസ്റ്റ് ചെയ്തു, അപകടത്തെക്കുറിച്ച് അന്വേഷണം ആരംഭിച്ചു.

അമിത വേഗതയോ അശ്രദ്ധയോ അപകടത്തില്‍ പങ്കുവഹിച്ചിട്ടുണ്ടോ എന്നതുള്‍പ്പെടെയുള്ള കാരണങ്ങള്‍ അധികൃതര്‍ പരിശോധിച്ചുവരികയാണ്.