തെരഞ്ഞെടുപ്പില്‍ ബിജെപി വിജയിച്ചാല്‍ നവീന്‍ പട്നായിക്കിന്റെ ആരോഗ്യനിലയെക്കുറിച്ച് അന്വേഷിക്കാന്‍ സമിതി രൂപീകരിക്കും; പ്രധാനമന്ത്രി

ഡല്‍ഹി: ബിജെപി സംസ്ഥാനത്ത് അധികാരത്തിലെത്തിയാല്‍ ഒഡീഷ മുഖ്യമന്ത്രി നവീന്‍ പട്നായിക്കിന്റെ ആരോഗ്യനില പെട്ടെന്ന് വഷളായതിനെ കുറിച്ച് അന്വേഷിക്കാന്‍ പ്രത്യേക സമിതി രൂപീകരിക്കുമെന്ന് പ്രധാനമന്ത്രി നരേന്ദ്ര മോദി.

ബിജെഡി മേധാവിയുടെ ആരോഗ്യനില വഷളായതിന് പിന്നില്‍ വലിയ ഗൂഢാലോചനയുണ്ടാകാമെന്ന് പ്രധാനമന്ത്രി പറഞ്ഞു. ഒഡീഷയിലെ ബരിപാഡയില്‍ ഒരു റാലിയെ അഭിസംബോധന ചെയ്യുകയായിരുന്നു മോദി. 

വര്‍ഷങ്ങളായി നവീന്‍ പട്നായിക്കുമായി അടുപ്പമുള്ള ആളുകള്‍ എന്നെ കാണുമ്പോഴെല്ലാം അദ്ദേഹത്തിന്റെ ആരോഗ്യത്തെക്കുറിച്ച് ചര്‍ച്ച ചെയ്യാറുണ്ട്. നവീന്‍ പട്നായിക്കിന് ഇനി സ്വന്തമായി ഒന്നും ചെയ്യാന്‍ കഴിയില്ലെന്ന് അവര്‍ എന്നോട് പറയുന്നു, പ്രധാനമന്ത്രി മോദി പറഞ്ഞു.

പട്നായിക്കിന് വേണ്ടി ഒഡീഷ സര്‍ക്കാര്‍ ഭരിക്കുന്ന ഒരു ലോബിയാണോ അദ്ദേഹത്തിന്റെ ആരോഗ്യനിലയ്ക്ക് ഉത്തരവാദിയെന്ന് പ്രധാനമന്ത്രി ചോദിച്ചു. നവീന്‍ പട്നായിക്കിന്റെ ആരോഗ്യനില വഷളായതിനു പിന്നില്‍ ഗൂഢാലോചന നടന്നിട്ടുണ്ടെന്നാണ് അദ്ദേഹവുമായി ഏറെക്കാലമായി അടുപ്പമുള്ളവര്‍ വിശ്വസിക്കുന്നത്.

നവീന്‍ പട്‌നായിക്കിന്റെ പേരില്‍ ഒഡീഷയില്‍ അധികാരം ആസ്വദിക്കുന്ന ലോബിയാണോ അദ്ദേഹത്തിന്റെ അനാരോഗ്യത്തിന് ഉത്തരവാദിയെന്ന് അറിയേണ്ടത് ഒഡീഷയിലെ ജനങ്ങളുടെ അവകാശമാണെന്നും പ്രധാനമന്ത്രി പറഞ്ഞു.