രാജ്യത്തിന് പിതാക്കന്മാരില്ല, പുത്രന്മാരാണുള്ളത്; കങ്കണയുടെ പ്രസ്താവന വിവാദത്തിൽ

ഡൽഹി: നടിയും എംപിയുമായ കങ്കണ റണാവത്തിനെതിരെ പുതിയ വിവാദം. ഗാന്ധിജയന്തി ദിനത്തിൽ സോഷ്യൽ മീഡിയയിൽ പങ്കുവച്ച പോസ്റ്റാണ് വിവാദമായത്.

''രാജ്യത്തിന് പിതാക്കന്മാരില്ല, പുത്രന്മാരാണുള്ളത്. ഭാരതമാതാവിന്റെ ഈ പുത്രന്മാർ അനുഗൃഹീതരാണ്’ എന്നാണ് കങ്കണ സോഷ്യൽ മീഡിയയിൽ കുറിച്ചത്.

ഇതിനൊപ്പം ലാൽ ബഹദൂർ ശാസ്ത്രിയുടെ 120-ാം ജന്മവാർഷികത്തിൽ ആദരാഞ്ജലിയും അർപ്പിച്ചിരുന്നു.

കങ്കണയുടെ പ്രസ്താവനയെ വിമർശിച്ച് കോൺഗ്രസ് നേതാവ് സുപ്രിയ ശ്രിനേത് രംഗത്തെത്തി.

'മഹാത്മാഗാന്ധിയുടെ ജന്മദിനത്തിലാണ് ബിജെപി എംപി കങ്കണ പരിഹാസപരമായ പ്രസ്താവന നടത്തിയത്. തന്റെ പാർട്ടിയിലെ പുതിയ ഗോഡ്‌സെ ഭക്തയോട് നരേന്ദ്ര മോദി ക്ഷമിക്കുമോ?,'' കോൺഗ്രസ് നേതാവ് ചോദിച്ചു.