മഹാരാഷ്ട്ര നിയമസഭാ തെരഞ്ഞെടുപ്പ്: സംസ്ഥാനത്തെ 'സ്പീഡ് ബ്രേക്കര്‍' രാഷ്ട്രീയം അവസാനിപ്പിക്കാനുള്ള പോരാട്ടമാണ് ഞാന്‍ ഏറ്റെടുത്തിരിക്കുന്നത്, ആദിത്യ താക്കറെയുമായി എനിക്ക് വ്യക്തിപരമായ പ്രശ്നങ്ങളൊന്നുമില്ല: ആദിത്യയെ തന്റെ ഇളയ സഹോദരനായാണ് കാണുന്നതെന്ന് മിലിന്ദ് ദേവ്റ

മുംബൈ:  മഹാരാഷ്ട്ര നിയമസഭാ തെരഞ്ഞെടുപ്പില്‍ വോര്‍ലി നിയോജക മണ്ഡലത്തില്‍ നിന്ന് എതിരാളിയായ ആദിത്യ താക്കറെയ്ക്കെതിരെ മത്സരിക്കാന്‍ ഏകനാഥ് ഷിന്‍ഡെയുടെ നേതൃത്വത്തിലുള്ള ശിവസേന നേതാവ് മിലിന്ദ് ദേവ്റ നാമനിര്‍ദ്ദേശ പത്രിക സമര്‍പ്പിച്ചു.

വരാനിരിക്കുന്ന തിരഞ്ഞെടുപ്പില്‍ സംസ്ഥാനത്തെ 'സ്പീഡ് ബ്രേക്കര്‍' രാഷ്ട്രീയം അവസാനിപ്പിക്കാനുള്ള പോരാട്ടമാണ് താന്‍ ഏറ്റെടുത്തിരിക്കുന്നതെന്ന് അദ്ദേഹം പറഞ്ഞു.

ആദിത്യ താക്കറെയുമായി എനിക്ക് വ്യക്തിപരമായ പ്രശ്നങ്ങളൊന്നുമില്ല. ചെറുപ്പം മുതലേ എനിക്കവനെ അറിയാം. ഞാന്‍ അവനെ എന്റെ ഇളയ സഹോദരനെ പോലെയാണ് കണക്കാക്കുന്നത്. ദൗര്‍ഭാഗ്യവശാല്‍ കഴിഞ്ഞ കുറച്ച് വര്‍ഷങ്ങളായി സംസ്ഥാനത്ത് ട്രെന്‍ഡ് ആയ സ്പീഡ് ബ്രേക്കര്‍ രാഷ്ട്രീയത്തിനെതിരെ നമ്മള്‍ പോരാടേണ്ടതുണ്ട്. ആദിത്യ താക്കറെ ഒരു ചെറുപ്പക്കാരനാണെന്നും മിലിന്ദ് ദേവ്റ പറഞ്ഞു.

കോണ്‍ഗ്രസ് നേതാവും മുന്‍ കേന്ദ്ര സഹമന്ത്രിയുമായിരുന്ന ദേവ്റ വരാനിരിക്കുന്ന ലോക്സഭാ തിരഞ്ഞെടുപ്പിന് മുന്നോടിയായാണ് ഏകനാഥ് ഷിന്‍ഡെയുടെ വിഭാഗത്തില്‍ ചേര്‍ന്നത്. തുടര്‍ന്ന് രാജ്യസഭയിലേക്ക് സീറ്റ് നേടുകയും ചെയ്തിരുന്നു.

പാര്‍ട്ടി അധികാരത്തിലിരുന്നപ്പോള്‍ മഹാരാഷ്ട്രയിലെ പ്രധാന പദ്ധതികള്‍ വൈകിപ്പിച്ചെന്ന് ആരോപിച്ച് ആദിത്യ താക്കറെയ്ക്കെതിരെ അദ്ദേഹം ആക്രമണം നടത്തി. 

ആദിത്യ താക്കറെ ഒരുപാട് വാഗ്ദാനങ്ങളോടെയാണ് വന്നത്, എന്നാല്‍ 11 വര്‍ഷം മുമ്പ് നടക്കേണ്ടിയിരുന്ന മഹാലക്ഷ്മി റേസ് കോഴ്സ് പദ്ധതിയെ എതിര്‍ത്തു.

സംസ്ഥാന ഖജനാവിന് 14,000 കോടി രൂപ നഷ്ടമുണ്ടാക്കി മെട്രോ പദ്ധതിയും അദ്ദേഹം വൈകിപ്പിച്ചു. വധ്വാന്‍ തുറമുഖം എന്ന മറ്റൊരു പ്രധാന പദ്ധതിയും അദ്ദേഹം വൈകിപ്പിച്ചു. ലോകത്തിലെ ഏറ്റവും വലിയ ആണവ നിലയ പദ്ധതിയും അദ്ദേഹം വൈകിപ്പിച്ചു, ദിയോറ പറഞ്ഞു.