പാതിരിമാരെ അടിച്ചോടിക്കുന്നവർക്ക് പാരിതോഷികം പ്രഖ്യാപിച്ച ബിജെപി എംഎൽഎ ഗോപിചന്ദ് പടൽക്കർക്കെതിരെ കത്ത് നൽകി കോൺഗ്രസ്; വിദ്വേഷ പ്രസംഗം ഭരണഘടനാ ലംഘനം, മുഖ്യമന്ത്രി ഇടപെടണം - മഹാരാഷ്ട്രാ കോൺഗ്രസ് ജനറൽ സെക്രട്ടറി ജോജോ തോമസ്

മുംബൈ: ബി.ജെ.പി. എം.എൽ.എ ഗോപിചന്ദ് പടൽക്കർ നടത്തിയ വിദ്വേഷ പ്രസംഗത്തിനെതിരെ നടപടി ആവശ്യപ്പെട്ട് മഹാരാഷ്ട്ര മുഖ്യമന്ത്രി, ദേവേന്ദ്ര ഫഡ്‌നാവിസിന് കത്തയച്ച് മഹാരാഷ്ട്രാ കോൺഗ്രസ് ജനറൽ സെക്രട്ടറി ജോജോ തോമസ്.

പടൽക്കറുടെ പ്രസ്താവനകൾ ഇന്ത്യൻ ഭരണഘടനയുടെ അടിസ്ഥാന തത്വങ്ങളെ അട്ടിമറിക്കുന്നതും മതസ്പർധ വളർത്തുന്നതുമാണെന്ന് കത്തിൽ ചൂണ്ടിക്കാട്ടുന്നു.

ഒരു ജനപ്രതിനിധിക്ക് എം.എൽ.എ. പദവിയിൽ തുടരാൻ യോഗ്യതയില്ലെന്നും, അദ്ദേഹത്തിനെതിരെ അടിയന്തര നിയമനടപടി സ്വീകരിക്കണമെന്നും ജോജോ തോമസ് ആവശ്യപ്പെട്ടു.

ജൂൺ 18-ന് സാംഗ്ലി ജില്ലയിലെ ഗുണ്ടേവാഡിയിൽ നടന്ന പൊതുപരിപാടിയിൽ പടൽക്കർ നടത്തിയ പ്രസ്താവനകളാണ് വിവാദമായത്. അനധികൃത ക്രിസ്ത്യൻ പ്രാർത്ഥനാലയങ്ങൾ മൂന്ന് ദിവസത്തിനുള്ളിൽ പൊളിച്ചുനീക്കണമെന്നും, അല്ലാത്തപക്ഷം ഉദ്യോഗസ്ഥർക്ക് "ബഹുജന എതിർപ്പ്" നേരിടേണ്ടി വരുമെന്നും എം.എൽ.എ. പരസ്യമായി ആഹ്വാനം ചെയ്തു.

മതപരിവർത്തനം തടയുന്നവരെ താൻ പോലീസിൽ നിന്ന് സംരക്ഷിക്കുമെന്നും, ക്രിസ്ത്യൻ മിഷനറിമാരെ "പെരുമ്പാമ്പുകളോട്" ഉപമിച്ച് അധിക്ഷേപിക്കുകയും ചെയ്തു. കൂടാതെ, ഹിന്ദു ധർമ്മ സംവരണത്തിലൂടെ ജോലി നേടിയ ശേഷം രഹസ്യമായി മറ്റൊരു മതം പിന്തുടരുന്ന സർക്കാർ ജീവനക്കാരെ പിരിച്ചുവിടണമെന്നും, മതപരിവർത്തനം തടയുന്ന ഗ്രാമീണർക്ക് പാരിതോഷികം നൽകണമെന്നും അദ്ദേഹം ആഹ്വാനം ചെയ്തു.

ഈ പ്രസ്താവനകൾ മതപരമായ വിവേചനത്തെയും നിയമവിരുദ്ധമായ ഇടപെടലുകളെയും പ്രോത്സാഹിപ്പിക്കുന്നതാണെന്ന് ജോജോ തോമസ് കത്തിൽ വ്യക്തമാക്കുന്നു.

ഭരണഘടനാ ലംഘനം: പടൽക്കറുടെ പ്രസ്താവനകൾ ഇന്ത്യൻ ഭരണഘടനയുടെ അനുച്ഛേദങ്ങൾ 14 (സമത്വത്തിനുള്ള അവകാശം), 15 (വിവേചനം നിരോധിക്കൽ), 25 (മതസ്വാതന്ത്ര്യം), 26 (മതപരമായ കാര്യങ്ങൾ കൈകാര്യം ചെയ്യാനുള്ള സ്വാതന്ത്ര്യം) എന്നിവയുടെ നേരിട്ടുള്ള ലംഘനമാണെന്ന് ജോജോ തോമസ് ചൂണ്ടിക്കാട്ടി.

കൂടാതെ, ഇന്ത്യൻ ശിക്ഷാ നിയമത്തിലെ 153എ (മതത്തിന്റെ അടിസ്ഥാനത്തിൽ ശത്രുത വളർത്തൽ), 295എ (ഏതെങ്കിലും മതവിഭാഗത്തെ അപമാനിക്കൽ), 505 (പൊതു ദ്രോഹത്തിന് കാരണമാകുന്ന പ്രസ്താവനകൾ) എന്നീ വകുപ്പുകൾ പ്രകാരമുള്ള കുറ്റകൃത്യങ്ങൾക്ക് സമാനമാണ് ഈ പ്രസംഗം.

ജോജോ തോമസ് തന്റെ പ്രസ്താവനയിൽ പറഞ്ഞു: "ഇന്ത്യൻ ഭരണഘടനയിൽ തൊട്ട് സത്യപ്രതിജ്ഞ ചെയ്ത ഒരു എം.എൽ.എ. തന്റെ പദവിക്ക് നിരക്കാത്ത രീതിയിൽ വിദ്വേഷ പ്രസംഗം നടത്തുകയും ജനങ്ങൾക്കിടയിൽ സ്പർധ വളർത്താനും വിവേചനം സൃഷ്ടിക്കാനും ശ്രമിക്കുകയും ചെയ്യുന്നത് അദ്ദേഹം ഈ സ്ഥാനത്തിരിക്കാൻ യോഗ്യനല്ലെന്ന് തെളിയിച്ചിരിക്കുകയാണ്.

അതിനാൽ അദ്ദേഹം രാജിവെച്ച് പുറത്തുപോകുകയോ അദ്ദേഹത്തിന്റെ പാർട്ടി രാജി ആവശ്യപ്പെടുകയോ ചെയ്യണം.

മതപരിവർത്തനത്തോട് യോജിക്കുന്നില്ലെങ്കിലും, ഏത് മതത്തിൽ വിശ്വസിക്കുവാനും ആരാധന നടത്താനുമുള്ള ഇന്ത്യൻ ഭരണഘടന നൽകുന്ന സ്വാതന്ത്ര്യത്തെ ഒരു എം.എൽ.എ. വെല്ലുവിളിക്കുന്നത് അദ്ദേഹത്തിന്റെ അജ്ഞതയാണ്. നിയമം കയ്യിലെടുക്കുവാൻ ഒരു ജനക്കൂട്ടത്തെ പ്രേരിപ്പിക്കുന്നത് കടുത്ത നിയമ ലംഘനമാണ്."

ബി.ജെ.പി.യുടെ ഇരട്ടത്താപ്പ്: "നിയമം ലംഘിച്ച എം.എൽ.എയ്ക്ക് എന്തുകൊണ്ടാണ് പോലീസ് സംരക്ഷണം നൽകുന്നതെന്ന് വ്യക്തമാക്കണം. ഇതിനോടകം പല സ്ഥലങ്ങളിലും പരാതി നൽകിയിട്ടും പോലീസ് ഇതുവരെ എഫ്.ഐ.ആർ. രജിസ്റ്റർ ചെയ്തിട്ടില്ല.

ഇത് ആശങ്കാജനകമാണ്. ബി.ജെ.പി. സർക്കാർ ഇത് കണ്ടില്ലെന്ന് നടിക്കുന്നത് സംസ്ഥാനത്തെ ഭരണപരാജയമാണ് ചൂണ്ടിക്കാണിക്കുന്നത്. മുഖ്യമന്ത്രി ഇവരെ നിലയ്ക്ക് നിർത്തണം," ജോജോ തോമസ് ആവശ്യപ്പെട്ടു.

"ബി.ജെ.പി.യുടെ ക്രിസ്ത്യൻ സ്നേഹം ഇരട്ടത്താപ്പാണ്. ഒരുവശത്ത്, ബി.ജെ.പി. എം.എൽ.എ. ക്രിസ്ത്യാനികൾക്കും പുരോഹിതർക്കും എതിരെ ആഞ്ഞടിക്കുമ്പോൾ, മറുവശത്ത്, ക്രിസ്ത്യാനികൾക്ക് എണ്ണത്തിൽ കൂടുതലുള്ള കേരളം അടക്കമുള്ള സംസ്ഥാനങ്ങളിൽ ബി.ജെ.പി. നേതൃത്വം ക്രിസ്ത്യാനികളെ ഒപ്പം കൂട്ടാൻ ശ്രമിക്കുന്നത് അവരുടെ തനിനിറം വെളിപ്പെടുത്തുന്നു."

ഈ വിഷയത്തിൽ ബി.ജെ.പി. നേതൃത്വം ശക്തമായ നിലപാട് സ്വീകരിക്കണമെന്നും, മുഖ്യമന്ത്രി ദേവേന്ദ്ര ഫഡ്‌നാവിസും പ്രധാനമന്ത്രിയും ഈ വിഷയത്തിൽ തങ്ങളുടെ അഭിപ്രായം വ്യക്തമാക്കണമെന്നും ജോജോ തോമസ് ആവശ്യപ്പെട്ടു.

"ഇത്തരം വിദ്വേഷ പ്രസംഗങ്ങൾ ജനാധിപത്യ സമൂഹത്തിൽ അനുവദനീയമല്ല. വർഗീയ ധ്രുവീകരണത്തിന് ശ്രമിക്കുന്നവരെ നിയമത്തിന് മുന്നിൽ കൊണ്ടുവരണം," അദ്ദേഹം കൂട്ടിച്ചേർത്തു. വരും ദിവസങ്ങളിൽ മഹാരാഷ്ട്രയിൽ 100 ൽ അധികം പരാതികൾ നൽകും.