പാരീസ്-മുംബൈ വിസ്താര വിമാനത്തിന് ബോംബ് ഭീഷണി; അടിയന്തരമായി ലാന്‍ഡ് ചെയ്തു

മുംബൈ; 306 യാത്രക്കാരുമായി മുംബൈയിലേക്കു പുറപ്പെട്ട വിസ്താര വിമാനത്തിന് ബോംബ് ഭീഷണി. പാരീസിലെ ചാള്‍സ് ഡി ഗല്ലെ വിമാനത്താവളത്തില്‍ നിന്ന് പറന്നുയര്‍ന്ന യുകെ 024 വിമാനം ഞായറാഴ്ച രാവിലെ 10.19 ന് മുംബൈയിലെ ഛത്രപതി ശിവാജി മഹാരാജ് ഇന്റര്‍നാഷണല്‍ എയര്‍പോര്‍ട്ടില്‍ ഇറക്കിയതായി പിടിഐ വാര്‍ത്താ ഏജന്‍സി റിപ്പോര്‍ട്ട് ചെയ്തു.

രാവിലെ 10.08ന് മുംബൈ വിമാനത്താവളത്തില്‍ അടിയന്തരാവസ്ഥ പ്രഖ്യാപിച്ചിരുന്നു. 306 പേരില്‍ 294 പേര്‍ യാത്രക്കാരും 12 പേര്‍ ജീവനക്കാരുമാണ്.

2024 ജൂണ്‍ 2 ന് പാരീസില്‍ നിന്ന് മുംബൈയിലേക്ക് സര്‍വീസ് നടത്തുന്ന യുകെ 024 വിമാനത്തില്‍ സുരക്ഷാ ഭീഷണി നേരിട്ടതായി വിസ്താര ഒരു പ്രസ്താവനയില്‍ പറഞ്ഞു.

വിവരം ലഭിച്ചയുടന്‍ ബന്ധപ്പെട്ട അധികാരികളെ ഉടന്‍ വിവരം അറിയിച്ചതായും സുരക്ഷാ ഏജന്‍സികളുമായി എല്ലാ നിര്‍ബന്ധിത പരിശോധനകള്‍ക്കും വിസ്താര പൂര്‍ണ്ണമായി സഹകരിക്കുന്നുണ്ടെന്നും എയര്‍ലൈന്‍ വക്താവ് കൂട്ടിച്ചേര്‍ത്തു.