മഹാരാഷ്ട്ര തെരഞ്ഞെടുപ്പ്: പാല്‍ഘറില്‍ വാനില്‍ കടത്തിക്കൊണ്ടുവന്ന 3.7 കോടി രൂപ പിടിച്ചെടുത്തു

മുംബൈ:  നവംബര്‍ 20ന് നടക്കുന്ന നിയമസഭാ തെരഞ്ഞെടുപ്പിന്റെ പെരുമാറ്റച്ചട്ടം നിലനില്‍ക്കെ മഹാരാഷ്ട്രയിലെ പാല്‍ഘര്‍ ജില്ലയില്‍ ഒരു വാനില്‍ നിന്ന് 3.70 കോടിയിലധികം രൂപ പോലീസ് പിടിച്ചെടുത്തു. വെള്ളിയാഴ്ചയാണ് പണം പിടികൂടിയത്.

നവി മുംബൈയിലെ ഐറോളിയില്‍ നിന്ന് വിക്രംഗഢിലെ വാഡയിലേക്ക് പോകുകയായിരുന്ന വാഹനത്തില്‍ നിന്നാണ് പണം പിടിച്ചെടുത്തതെന്ന് അധികൃതര്‍ പറഞ്ഞു.

പണം എടിഎം റീഫില്‍ ചെയ്യാനുള്ളതാണെന്ന് കാറിന്റെ ഉടമസ്ഥതയിലുള്ള കമ്പനി അവകാശപ്പെട്ടു. എന്നാല്‍ ഈ അവകാശവാദത്തെ പിന്തുണയ്ക്കുന്നതിന് ആവശ്യമായ ഡോക്യുമെന്റേഷന്‍ നല്‍കാന്‍ ഡ്രൈവര്‍ക്ക് കഴിഞ്ഞില്ല.

ജില്ലയിലൂടെ ഒരു വാനില്‍ പണം കടത്തുന്നതായി പോലീസിന്റെ വിജിലന്‍സിനും ഫ്ളയിംഗ് സ്‌ക്വാഡിനും രഹസ്യവിവരം ലഭിച്ചതായി പോലീസ് ഇന്‍സ്പെക്ടര്‍ ദത്ത കിന്ദ്രെ പറഞ്ഞു.

വിവരത്തിന്റെ അടിസ്ഥാനത്തില്‍ സംഘം വാന്‍ തടഞ്ഞുനിര്‍ത്തി നടത്തിയ പരിശോധനയില്‍ 3,70,50,000 രൂപ കടത്തുന്നതായി കണ്ടെത്തി.

പണം കൊണ്ടുപോകുന്നതിന് ആവശ്യമായ സാധുതയുള്ള രേഖകള്‍ ഹാജരാക്കുന്നതില്‍ ഡ്രൈവറും സെക്യൂരിറ്റി ജീവനക്കാരും പരാജയപ്പെട്ടു.