ഉത്സവങ്ങളിലും വിവാഹ ആഘോഷങ്ങളിലും ബിയർ വിളമ്പുന്നത് നിരോധിച്ച് ഹിമാചൽ പ്രദേശിലെ സ്പിതി ജില്ലയിലെ കീലോംഗ് പഞ്ചായത്ത്

ഹിമാചൽ: ഉത്സവങ്ങളിലും വിവാഹ ആഘോഷങ്ങളിലും ബിയർ വിളമ്പുന്നത് നിരോധിച്ച് ഹിമാചൽ പ്രദേശിലെ സ്പിതി ജില്ലയിലെ കീലോംഗ് പഞ്ചായത്ത്. നിരോധനം സംബന്ധിച്ച് പഞ്ചായത്ത് പ്രമേയം പാസാക്കിയതായാണ് പുറത്തു വരുന്ന വിവരം. പാഴ് ചെലവ് തടയുന്നതിന്റെ ഭാഗമായാണ് തീരുമാനമെന്ന് പഞ്ചായത്ത് മേധാവി അറിയിച്ചു.

ഞായറാഴ്ച ചേർന്ന ഗ്രാമസഭാ യോഗത്തിൽ ഉത്സവങ്ങളിലും വിവാഹ ആഘോഷങ്ങളിലും ബിയർ വിളമ്പുന്നത് നിർത്താൻ സമവായ തീരുമാനമെടുത്തതായി പഞ്ചായത്ത് മേധാവി സോനം സാങ്പോ പറഞ്ഞു. വിവാഹങ്ങളിലും മറ്റ് ആഘോഷങ്ങളിലും പാശ്ചാത്യ സംസ്കാരം കലർത്തുന്നത് തടയുന്നതിനെക്കുറിച്ചും യോഗം ചർച്ച ചെയ്തതായും അദ്ദേഹം കൂട്ടിച്ചേർത്തു.

സംസ്‌കാരവും പാരമ്പര്യവും സംരക്ഷിക്കുന്നതിൽ യുവാക്കൾക്കും ഉത്കണ്ഠയുള്ളതിനാൽ ഇക്കാര്യത്തിൽ ഏകകണ്ഠമായ തീരുമാനം ഉടൻ ഉണ്ടാകുമെന്നാണ് പ്രതീക്ഷിക്കുന്നതെന്ന് ജില്ലാ പരിഷത്ത് അംഗം കുംഗ ബോധ് പ്രതികരിച്ചു. നേരത്തെ, കിന്നൗർ ജില്ലയിലെ ഹാംഗ്‌രാംഗ് താഴ്‌വരയിലെ സുമാര പഞ്ചായത്ത് വിവാഹങ്ങളിൽ ഗോത്ര ആചാരങ്ങൾ ഉയർത്തിപ്പിടിക്കാനും ബോളിവുഡ് ശൈലിയിലുള്ള ആഡംബര വിവാഹങ്ങൾ നിരോധിക്കാനും പ്രമേയം പാസാക്കിയിരുന്നു.