ഇലക്ട്രിക് വാഹന സ്റ്റാർട്ടപ്പായ ഏതർ എനർജി 2022 ജൂലൈ മാസത്തെ വിൽപ്പന കണക്കുകൾ വെളിപ്പെടുത്തി

ബംഗളൂരു ആസ്ഥാനമായുള്ള ഇലക്ട്രിക് വാഹന സ്റ്റാർട്ടപ്പായ ഏതർ എനർജി 2022 ജൂലൈ മാസത്തെ വിൽപ്പന കണക്കുകൾ വെളിപ്പെടുത്തി. കഴിഞ്ഞ മാസം ഇന്ത്യയിൽ 2,389 ഇലക്ട്രിക് സ്‍കൂട്ടറുകൾ വിൽക്കാൻ കമ്പനിക്ക് കഴിഞ്ഞു. കഴിഞ്ഞ വർഷത്തെ ഇതേ കാലയളവുമായി താരതമ്യപ്പെടുത്തുമ്പോള്‍ 2022 ജൂലൈയിൽ 24 ശതമാനം വളർച്ചയാണ് ഏതർ രേഖപ്പെടുത്തിയത്. 1,926 യൂണിറ്റായിരുന്നു 2021 ജൂലൈ മാസത്തിലെ വില്‍പ്പന.

അതേസമയം മാസ വില്‍പ്പനയുടെ അടിസ്ഥാനത്തിൽ കണക്കുകള്‍ താരതമ്യപ്പെടുത്തുമ്പോൾ, 2022 ജൂണിലെ കണക്കനുസരിച്ച് ഏതറിന്‍റെ വിൽപ്പന 26 ശതമാനം കുറഞ്ഞു. ജൂണ്‍ മാസത്തില്‍ കമ്പനി 3,231 ഇലക്ട്രിക് സ്‍കൂട്ടറുകൾ വിറ്റിരുന്നു. ഈ ഇടിവിന് കാരണമായി ആതർ എനർജി പറയുന്നത്, പുതുതായി ലോഞ്ച് ചെയ്‍ത ജെന്‍ 3 ഏതര്‍ 450X- ന്‍റെ നിര്‍മ്മാണ പ്രകൃയകള്‍ സുഗമമാക്കുന്നതിന് രണ്ടാഴ്ചത്തേക്ക് അതിന്റെ പ്രൊഡക്ഷൻ ലൈൻ അടച്ചതിനാൽ 2022 ജൂലൈയിലെ കമ്പനിയുടെ ഭൂരിഭാഗം വിൽപ്പനയും കഴിഞ്ഞ പത്ത് ദിവസങ്ങളിലാണ് നടന്നത് എന്നാണ്.

ഏതർ എനർജി കഴിഞ്ഞ മാസം മൂന്ന് പുതിയ വിപണികളിലേക്ക് (മുംബൈ, കൊല്ലം, ഡെറാഡൂൺ) അതിന്റെ റീട്ടെയിൽ ശൃംഖല കൂടുതൽ വിപുലീകരിച്ചു. ഇപ്പോൾ 38 ഇന്ത്യൻ നഗരങ്ങളിൽ 45 അനുഭവ കേന്ദ്രങ്ങളുമുണ്ട്.

പുതിയ 2022 ആതർ 450X, മെച്ചപ്പെടുത്തിയ റൈഡിംഗ് ശ്രേണിയും പുതിയ ഫീച്ചറുകളും മറ്റും വാഗ്ദാനം ചെയ്യുന്നു. ഡിസൈനിന്‍റെ കാര്യത്തിൽ ഇത് മാറ്റമില്ലാതെ തുടരുമ്പോൾ, ഇലക്ട്രിക് സ്‍കൂട്ടറിന് വലിയ റിയർ വ്യൂ മിററുകൾ ലഭിക്കുന്നു. വെള്ള, സ്പേസ് ഗ്രേ, മിന്റ് ഗ്രീൻ എന്നീ നിറങ്ങളിൽ ഇത് ഇപ്പോഴും ലഭ്യമാണ്. ആതർ എനർജി 450X-ന്റെ പവർട്രെയിൻ അപ്‌ഡേറ്റ് ചെയ്‌തു, ഇപ്പോൾ ഇതിന് മുമ്പത്തേക്കാൾ വലിയ ബാറ്ററി ലഭിക്കുന്നു.

മുൻ മോഡലിലെ 2.9kWh യൂണിറ്റിന് വിപരീതമായി 3.7kWh ലിഥിയം-അയൺ ബാറ്ററി പായ്ക്ക് ഈ ഇലക്ട്രിക് സ്‌കൂട്ടറിൽ ഇപ്പോൾ കമ്പനി അവതരിപ്പിക്കുന്നു. അനുയോജ്യമായ സാഹചര്യങ്ങളിൽ ക്ലെയിം ചെയ്‍ത ശ്രേണി ഒരു ചാർജിന് 106 കിലോമീറ്ററിൽ നിന്ന് 146 കിലോമീറ്ററായി ഉയർന്നു. കൂടാതെ, ആതർ 450X ഇ-സ്‌കൂട്ടറിന്റെ റേഞ്ച് ഇപ്പോൾ 20 കിലോമീറ്റർ വർധിച്ചു. ഇത് ഒറ്റ ചാർജില്‍ 105 കിലോമീറ്റർ റേഞ്ച് വാഗ്ദാനം ചെയ്യുന്നു.

ഈ ഇലക്ട്രിക് സ്‌കൂട്ടറിന്റെ മറ്റ് അപ്‌ഡേറ്റുകളിൽ 7.0-ഇഞ്ച് ടച്ച്‌സ്‌ക്രീൻ ഇൻസ്ട്രുമെന്റ് ക്ലസ്റ്ററിലെ മെച്ചപ്പെട്ട UI, MRF - 90/90-12 ഫ്രണ്ട് & 100/80-12 റിയർ എന്നിവയിൽ നിന്നുള്ള പുതിയ 12-ഇഞ്ച് ട്യൂബ്‌ലെസ് ടയറുകൾ ഉൾപ്പെടുന്നു. ടയർ പ്രഷർ മോണിറ്ററിംഗ് മുതലായവ ഉൾപ്പെടെ 450X-നൊപ്പം ഒരു കൂട്ടം പുതിയ ആക്‌സസറികളും ഏഥർ വാഗ്‍ദാനം ചെയ്യുന്നു. കമ്പനി 41 റീട്ടെയിൽ സ്റ്റോറുകളുള്ള 36 നഗരങ്ങളിലേക്ക് അതിന്റെ റീട്ടെയിൽ ശൃംഖലയും വിപുലീകരിച്ചു. കൂടാതെ 2023ല്‍ 100 നഗരങ്ങളിലെ 150 അനുഭവ കേന്ദ്രങ്ങളിലേക്ക് വ്യാപിപ്പിക്കാനും പദ്ധതിയിടുന്നു.

ബംഗളൂരു കേന്ദ്രീകരിച്ച് പ്രവര്‍ത്തിക്കുന്ന ഇലക്ട്രിക് സ്റ്റാര്‍ട്ടപ്പ് കമ്പനിയായ ഏഥര്‍ എനര്‍ജി, ഇന്ത്യയിലെ ആദ്യ ഇന്റലിജന്റ് വൈദ്യുത സ്‍കൂട്ടര്‍ നിര്‍മാതാക്കള്‍ കൂടിയാണ്. ഹീറോ മോട്ടോകോര്‍പ്പും ടൈഗര്‍ ഗ്ലോബല്‍ മാനേജ്‌മെന്റും പിന്തുണയ്ക്കുന്ന സ്റ്റാര്‍ട്ടപ്പ് സംരംഭം കൂടിയാണ് ഈ കമ്പനി. തങ്ങളുടെ സ്വന്തം ചാര്‍ജിങ് കണക്ടര്‍ മറ്റ് ഒഇഎമ്മുകള്‍ക്കു കൂടി ലഭ്യമാക്കുമെന്ന് അടുത്തിടെ ഏഥര്‍ എനര്‍ജി പ്രഖ്യാപിച്ചിരുന്നു. രാജ്യത്ത് വിവിധ കമ്പനികളുടെ ഇരുചക്ര വാഹനങ്ങള്‍ക്ക് അതിവേഗ ചാര്‍ജിങ് സംവിധാനം പരസ്‍പരം ഉപയോഗിക്കാനാവുന്ന സംവിധാനം ലഭ്യമാക്കുകയാണ് ഇതിലൂടെ ഉദ്ദേശിക്കുന്നത് എന്നാണ് കമ്പനി പറയുന്നത്. ഇന്ത്യയില്‍ ഉടനീളമുള്ള ഏഥറിന്റെ 200ല്‍ ഏറെ അതിവേഗ ചാര്‍ജറുകള്‍ ഉപയോഗിക്കാനുള്ള സൗകര്യവും ഇതുവഴി ലഭ്യമാക്കും.