ഹോണ്ട ആക്ടിവ 7G ഉടൻ ലോഞ്ച് ചെയ്യും; സ്‍ഥിരീകരിച്ച് ഹോണ്ട

ഇന്ത്യയിലെ ഏറ്റവും കൂടുതൽ വിറ്റഴിക്കപ്പെടുന്ന ജനപ്രിയ സ്‌കൂട്ടര്‍ മോഡലാണ് ജാപ്പനീസ് ഇരുചക്ര വാഹന ഭീമനായ ഹോണ്ടയുടെ ആക്ടിവ. ഇപ്പോഴിതാ പുത്തന്‍ ആക്ടിവ ഹോണ്ടയുടെ പണിപ്പുരയിലാണെന്നാണ് ഹോണ്ട എന്നാണ് പുതിയ റിപ്പോര്‍ട്ടുകള്‍.

ഹോണ്ട ആക്ടിവ 7G ഉടൻ ലോഞ്ച് ചെയ്യുമെന്ന് പ്രതീക്ഷിക്കുന്നതായും സ്‍കൂട്ടറിന്‍റെ മുഴുവൻ രൂപഘടനയും വെളിപ്പെടുത്തുന്ന ടീസർ ചിത്രത്തിലൂടെ ഹോണ്ട മോട്ടോർസൈക്കിൾസ് ആൻഡ് സ്‌കൂട്ടർ ഇന്ത്യ ലിമിറ്റഡ് ടീസ് ചെയ്‍തതായും എച്ച്ടി ഓട്ടോ റിപ്പോര്‍ട്ട് ചെയ്യുന്നു. പുതിയ സ്‍കൂട്ടർ നിലവിലെ മോഡലിന് സമാനമായിരിക്കും എന്നാണ് റിപ്പോര്‍ട്ടുകള്‍. എന്നിരുന്നാലും, പുതിയ മോഡലിൽ കോസ്‌മെറ്റിക്, ഫീച്ചർ അപ്‌ഡേറ്റുകളുടെ ഒരു ശ്രേണി പ്രതീക്ഷിക്കാം.

പുതിയ തലമുറ മോഡലായ ഹോണ്ട ആക്ടിവ 7G ആയി പുതിയ മോഡൽ വരുമെന്ന് പ്രതീക്ഷിക്കുന്നു. രണ്ട് വര്‍ഷം മുമ്പാണ് ആക്ടിവ 6G അവതരിപ്പിക്കുന്നത്. വളരെക്കാലമായി ഇന്ത്യയിൽ ഏറ്റവും കൂടുതൽ വിറ്റഴിക്കപ്പെടുന്ന സ്‍കൂട്ടറാണ് ഹോണ്ട ആക്ടിവ. ഏറ്റവും കൂടുതൽ വിറ്റഴിക്കപ്പെടുന്ന ഇന്ത്യൻ ഇരുചക്രവാഹനങ്ങളുടെ പട്ടികയിൽ ഹീറോ സ്‌പ്ലെൻഡറിനെ പിന്തള്ളി ഹോണ്ട ഒന്നാം സ്ഥാനം കരസ്ഥമാക്കിയത് ആക്ടിവയുടെ കരുത്തില്‍ ആയിരുന്നു.

വരാനിരിക്കുന്ന പുതിയ തലമുറ ഹോണ്ട ആക്ടിവ സ്റ്റാൻഡേർഡ്, സ്‌പോർട്‌സ്, നോർമൽ എന്നിങ്ങനെ മൂന്ന് വേരിയന്റുകളിൽ വാഗ്ദാനം ചെയ്യാൻ സാധ്യതയുണ്ട്. നിലവിലെ 110 സിസി ഫാൻ-കൂൾഡ് ഫോർ-സ്ട്രോക്ക് എഞ്ചിൻ സ്‍കൂട്ടറില്‍ തുടരും. ഈ എഞ്ചിന് പരമാവധി 7.68 bhp കരുത്തും 8.79 Nm ടോര്‍ക്കും ഉത്പാദിപ്പിക്കാൻ കഴിയും. ആക്ടീവ 6G-യെ അപേക്ഷിച്ച് ഇന്ധനക്ഷമതയും മെച്ചപ്പെടുമ്പോൾ, വരാനിരിക്കുന്ന മോഡലിൽ പവറും ടോർക്ക് ഔട്ട്പുട്ടും തിരികെ ലഭിക്കുമെന്ന് പ്രതീക്ഷിക്കാം.

എൽഇഡി ഹെഡ്‌ലാമ്പുകൾ, എൽഇഡി ടെയിൽലൈറ്റുകൾ, എൽഇഡി ഡേടൈം റണ്ണിംഗ് ലൈറ്റുകൾ, എൽഇഡി ടേൺ ഇൻഡിക്കേറ്ററുകൾ, ഫുൾ ഡിജിറ്റൽ ഇൻസ്ട്രുമെന്റ് ക്ലസ്റ്റർ എന്നിവയുമായി പുതിയ തലമുറ ഹോണ്ട ആക്ടിവ എത്തിയേക്കാം.ടീസർ ചിത്രമല്ലാതെ സ്കൂട്ടറിനെക്കുറിച്ചുള്ള വിശദാംശങ്ങളൊന്നും കമ്പനി വെളിപ്പെടുത്തിയിട്ടില്ല. അതേസമയം ലോഞ്ച് ഉടൻ ഉണ്ടാകുമെന്നും കമ്പനി അവകാശപ്പെടുന്നു.

2001-ൽ ആണ് ഹോണ്ട ആക്ടിവ സ്‌കൂട്ടർ ഇന്ത്യയില്‍ ആദ്യമായി അവതരിപ്പിച്ചത്. അതിനുശേഷം സ്‌കൂട്ടർ ഇന്ത്യൻ ഇരുചക്രവാഹന വിപണിയിൽ ആധിപത്യം സ്ഥാപിച്ചു. 110 സിസി വേരിയന്റുകൾക്ക് പുറമെ, ആക്ടിവ 125 മോഡലും ഓഫറിലുണ്ട്. അത് പ്രീമിയം 125 സിസി വിഭാഗത്തിൽ സ്ഥാനം പിടിച്ചിരിക്കുന്നു. ജൂപ്പിറ്റർ 125 , വെസ്‍പ 125 തുടങ്ങിയ എതിരാളികളുമായി ഹോണ്ട ആക്ടിവ മത്സരിക്കുന്നു. ആക്ടീവ 7G കൂടി എത്തിയാല്‍ ഹോണ്ട ഇന്ത്യയുടെ വിൽപ്പന വർദ്ധിപ്പിക്കുമെന്ന് പ്രതീക്ഷിക്കുന്നു.