ആഗോള വിപണിയിൽ ഇന്നോവ സെനിക്സ് എന്ന പേരിലുള്ള പുതുതലമുറ ഇന്നോവയെ ടൊയോട്ട പുറത്തിറക്കി; ശക്തമായ ഹൈബ്രിഡ് ഉൾപ്പെടെ രണ്ട് പവർട്രെയിൻ ഓപ്ഷനുകളുള്ള പുതിയ ഇന്നോവയുടെ പ്രത്യേകതകൾ നോക്കാം..

പ്രതീക്ഷിച്ചിരുന്നതുപോലെ ശക്തമായ ഹൈബ്രിഡ് ഉൾപ്പെടെ രണ്ട് പവർട്രെയിൻ ഓപ്ഷനുകളോടെയാണ് ടൊയോട്ട ഇന്നോവ ഹൈക്രോസ് വാഗ്ദാനം ചെയ്യുന്നത് എന്നാണ് പുതിയ റിപ്പോര്‍ട്ടുകള്‍. ശക്തമായ ഹൈബ്രിഡ് പവർട്രെയിനുമായി ഘടിപ്പിച്ചിരിക്കുന്ന 2.0 ലിറ്റർ പെട്രോൾ എഞ്ചിനായിരിക്കും വാഹനത്തിൽ. നിലവിൽ ഇന്ത്യയിൽ വിൽക്കുന്ന ഇന്നോവ മോഡലുകളേക്കാൾ വലുതാണ് ഇന്നോവ ഹൈക്രോസ്.

കഴിഞ്ഞ ദിവസം ഇന്തോനേഷ്യയിൽ അവതരിപ്പിച്ച ഇന്നോവ സെനിക്‌സ് മോഡലിന് 4,755 എംഎം നീളവും 1,850 എംഎം വീതിയും 1,795 എംഎം ഉയരവുമുണ്ട്. 2,850 എംഎം വീൽബേസുമുണ്ട്. ഇന്നോവ ഹൈക്രോസ് 185 എംഎം ഗ്രൗണ്ട് ക്ലിയറൻസ് നൽകും. മുൻ തലമുറ മോഡലുകളിൽ ഉപയോഗിച്ചിരുന്ന ലാഡർ ഫ്രെയിം ഷാസിക്ക് പകരം ടൊയോട്ടയിൽ നിന്നുള്ള പുതിയ മോണോകോക്ക് ഷാസിയെ അടിസ്ഥാനമാക്കിയാണ് വരാനിരിക്കുന്ന ഇന്നോവ ഹൈക്രോസ് . ഇത് റൈഡ് നിലവാരം, കൈകാര്യം ചെയ്യൽ, ബോഡി റോൾ എന്നിവ മെച്ചപ്പെടുത്താൻ സാധ്യതയുണ്ട്.

ഇന്നോവ സെനിക്സിൽ ഉപയോഗിച്ചിരിക്കുന്ന ഹൈബ്രിഡ് സാങ്കേതികവിദ്യ തന്നെയാണ് ഏറ്റവും പുതിയ ടൊയോട്ട പ്രിയസിനും ഉപയോഗിച്ചിരിക്കുന്നത്. ഇന്നോവ സെനിക്‌സ് ഹൈബ്രിഡ് ഇവി 152 പിഎസ് പവറും 188 എൻഎം പീക്ക് ടോർക്കും ഉത്പാദിപ്പിക്കുന്നു. 4-സിലിണ്ടർ ഡ്യുവൽ VVT-i എഞ്ചിൻ 113 PS പവറും 206 Nm ടോർക്കും ഉള്ള ഒരു ഇലക്ട്രിക് മോട്ടോർ ഉപയോഗിച്ച് ശക്തിപ്പെടുത്തുന്നു, അതിന്റെ ഫലമായി 186 PS ന്റെ സംയുക്ത ശക്തി ലഭിക്കും. പെട്രോൾ, ഹൈബ്രിഡ് എഞ്ചിനുകളിൽ സിവിടി ട്രാൻസ്മിഷൻ യൂണിറ്റ് സജ്ജീകരിച്ചിരിക്കുന്നു.

ഡിസൈനിനെ സംബന്ധിച്ച് പറയുകയാണെങ്കില്‍, പുതിയ ഇന്നോവ എം‌പി‌വിക്ക് കൂടുതൽ എസ്‌യുവി സ്റ്റൈല്‍ ഉണ്ട്. ഒറ്റനോട്ടത്തിൽ, ഇത് എംജി ഹെക്ടർ എസ്‌യുവിയുടെ രൂപവുമായി സാമ്യമുള്ളതായി തോന്നാം. ക്രോം ഇടപെടൽ കുറവുള്ള ഗ്രിൽ ഇപ്പോൾ വലുതും ബോൾഡുമാണ്. ഗ്രില്ലിന് വശങ്ങളിലായി എൽഇഡി ഹെഡ്‌ലൈറ്റുകളും എൽഇഡി ഡിആർഎൽ ബാറുകളും ഉണ്ട്. ഇരുവശത്തും വലിയ എയർ വെന്റുകളുള്ള ഫ്രണ്ട് ബമ്പറും മസ്‍കുലർ ആണ്.